Astigarragako Kultur Etxeko lorategiaren behealdean obra-lanak martxan jartzea onartu zuen azken Plenoak. Udal Gobernu Taldeak aurkeztu zuen proposamena, bi helbururekin: «Anuska auzoko irisgarritasuna hobetzea, eta lorategia berritzea».
Udalak jakinarazi duenez, «Añarbek Kale Nagusiko 51 zenbakian ur-horniduran egingo duen berrikuntza» aprobetxatuko da lan hauek egiteko.
Bide eta lorategi berritua
Proposamenean bi lan egitea aurreikusi da. Batetik, Kale Nagusia 35tik hasita berdeguneko goiko hesira arte bide berri bat sortzea, lorategia diagonalean zeharkatuko duena. Eta bestetik, lorategiko beheko aldea berritzea, zati hori auzoan integratzeko. Honekin, «irisgarritasuna hobetzea» espero da; «bide irisgarria eta argia egingo da, eta atseden elementuak jarriko dira. Era berean, Kale nagusia eta bide berriaren artean geldituko den espazioa hornituko da: aisialdi gunea 9-13 urte arteko umeentzat, altzari berriak, deskantsu gunea...».
Proiektua koordinatzeko «kanpoko arkitekto batekin ari da lanean Udala», eta berak proposatu zituen aldaketak. Proposamena Kontxa Etxeberria Fundazioko ordezkariei ere aurkeztu zaie, Kultur Etxeko lurren jabea delako, eta elkarlanerako prest azaldu dira. Bide batez, lorategiko beheko aldean Kontxaren Lorategia seinalea jarriko da.
Bizilagunei azalpenak
Egin behar diren tramiteekin bukatuta, auzoko bizilagunekin bilera informatiboa deituko duela jakinarazi du Udalak, obraren xehetasunen berri emateko.