Urtea ezin hobeto bukatu zuten Amaia Irazustabarrena eta Maider Huizi palista hernaniarrek, bi final irabazita. Bizkaia Torneoa irabazi zuten aurrena larunbatean; eta igandean jantzi zuten bigarren txapela, Sakanako txapelketan.
Araiztegi eta Mendizabalen aurka, Bizkaia Torneoan
Aski ezaguna duten bikotearen kontra jokatu zuten aurreneko finala, Bizkaia Torneoarena, Amaia Araiztegi eta Maider Mendizabalen aurka.
Amaia Araiztegi eta Maider Mendizabal izan zituzten aurkari, larunbatean.
Larruzko paletaz jokatu zuten, eta 4-8, 8-6, 8-3, 7-8 eta 8-3 nagusitu zitzaizkien aurkariei, larunbatean. Ordubete pasatxo iraun zuen partiduak; hasieran aurkariak indartsu hasi ziren, baina hernaniarrak izan ziren garaile, azkenean.
Sakanan txapela, igandean
Igandean jantzi zuten asteburuko eta urteko azkeneko txapela, Sakanako Txapelketan. Bertan, Irazustabarrena eta Huizik 25-16 irabazi zieten, Leire Etxaniz bizkaitarrari eta Ane Isasmendi gasteiztarrari.
Pala eskolaren topaketa, Zumaian
Pala gehiagorekin hasiko dute urtea. Oraingo honetan, pala eskolako gaztetxoen txanda izango da. GEPEk antolatuta, Hernaniko infantilek eta alebinek Zumaiako Aitzuri kiroldegian izango dute zita bihar. 09:45etan, benjaminak eta alebinak arituko dira, eta 11:15etan, infantilak.