Eguraldia ere lagun izango dute aurten, urtea korrika eta umore ederrean agurtu nahi dutenek. Wukroren aldeko San Silbestrea egingo dute gaur, arratsaldeko 17:30etan hasita.
Gaztetxoak izango dira korrika egiten aurrenekoak. Hasteko, 8 urte artekoak abiatuko dira, 300 metroko ibilbidea osatzeko. Ondoren, 17:45etan, 9-13 urte bitartekoen txanda izango da, eta 800 metro egingo dituzte haiek.
Eta azkenik, 18:00etan abiatuko da lasterketa nagusia, 14 urtetik gorakoena. Aurreko urteetan bezala, 4 kilometroko zirkuitua osatuko dute: Plazatik Lizeaga aldera abiatu, auzoari buelta eman, Atzietatik Zinkoeneara jaitsi eta handik Floridara, Montebideo eta Karmelo Labakatik Latsunbeberrira igo, auzoari buelta, eta Urbieta kaletik Plaza Berrira azalduta, Kale Nagusian gora bukatu, ikusleek osatuko duten pasillotik igarota, Plazaraino.
Azkeneko izenemateak gaur, irteera gunean bertan
Korrikalariek, Plazan jasoko dituzte dortsalak eta opariak, probaren aurretik. Eta oraindik apuntatu ez direnek, bertan izango dute azkeneko aukera; 11 euro izango dira.
Hiru lasterketetan, sariak emango dizkiete aurreneko hiru sailkatuei; eta aurten ere, beste sari berezi bat ere izango da: mozorro onenari saria.
Urtero urtero, mozorrotuta hartu dute parte, hainbat eta hainbat korrikalarik; baita iaz ere, eguraldi petrala izan arren. Beraz, gaurko iragarpena ikusita, ez dira gutxi izango, mozorro originalenak bilatu, eta urtea korrika bakarrik ez, umorez agurtuko dutenak.