Axel Jauregi eta Jon Zarautz hernaniarrek, 22 urterekin, Uniraid 2019 abentura solidarioan hartuko dute parte otsailaren 23tik martxoaren lehendabiziko astera arte. Bederatzi egun ibiliko dira Marokoko desertu eta mendietan barrena 20 urte baino gehiago dituen kotxean, hori baita raidaren baldintzetako bat, erabiltzen diren kotxe guztiak 20 urte baino gehiago edukitzea. «Eta beste baldintza eta garrantzitsuena, solidarioa dela» gogorazten du Jon Zarautzek. «Gutxienez 40 kilo material solidario eraman behar ditugu eta bertan banatu basamortuko eskoletan».
Ez da lasterketa hutsa, baizik eta abentura-bidaia baten filosofia du oinarrian. «18-28 urte bitarteko, Iberiar penintsulako, ikasleentzat dago zuzendua» dio Zarautzek. Axel Jauregik nondik norakoak ongi ezagutzen ditu, nahiz bientzat lehenengo esperientzia izan honelako proiektu batean. «Zazpi urteko bizitza du Uniraidek. Dakarren Medicos Sin Fronterasekin aurretik ibilitakoek sortu zuten. Erabaki zuten ikasleentzako antolatzea Dakar moduko esperientzia bat. Helburua material solidarioa banatzea da. Eskoletan banatzen da gehiena, baina gero bidean zoazenean jendearen beharrak ikusi eta materiala uzten duzu».
«Ezin da ez janaririk ezta medikamenturik banatu»
Materialaren artean ezin da ez janaria, ezta medikamenturik eraman. «Arropa, eskolako materiala, bizikletak eta jostailuak dira batez ere eramaten direnak. Antolatzaileek bideratzen dizute eta zerk duen balioa esaten dizute», argitu dute Jonek eta Axelek. «Posible da enpresa baten patrozinioa lortzea eta beraiek saltzen dutena eramatea», diote.
Abentura Hernanin bertan hasiko dute. «Partaide bakoitza bere inskripzio gunetik hasten da. Bartzelonan izena eman dutenek bertan hartzen dute ferrya, baina besteei Algeciraseraino jaistea derrigortzen gaituzte, eta bertan hartuko dugu ferrya Tangerrera. Bertan kotxeak ikuskatzen dituzte, ondo dauden ikusteko, eta orduan hasten da lehenengo etapa», azaldu dute Jonek eta Axelek.
Ehundik gora kotxek partehartzen dute. «Oraindik ez dakigu kopuru zehatza. 150 taldek hartzen dute parte. Kotxeak ezin du izan lau gurpiletako trakzioa, hau da ezin da todoterrenoa izan».
«350 eurotan erosi dugun 21 urteko Opel Astran egingo dugu ibilbidea»
Kotxeak bizi irautea da beraien lehenengo itxaropena. «1997ko Opel Astra batekin goaz. 350 euroan lortu dugu Barakaldon. Ez da abiadurako lasterketa bat eta partaideak zazpi etapa osatu behar ditugu bederatzi egunetan eta Tanger-ekoa kontutan hartzen badugu hamar. Azkenengo eguna libre uzten digute Marrakexen. Nabegazio etapak izaten dira eta beti ere Marokoko mugetan».
Basamortua ikutuko dute. «Lehenengo etapan Atlaseko elurra ere bai». Bartzelonan ikasten ari diren euskaldunek ere parte hartuko dute: «Azpeitiako eta Zarauzko neska-mutilak izango dira bertan, eta Bartzelonatik aterako dira».
18-28 urte bitarteko ikasleentzat dago zuzendua eta Iberiar penintsulako edozeinek hartu dezake parte. «Ezin da maparik erabili eta roadbook-arekin goaz»
Taldeak bikoteka osatzen dira. Axel Jauregi ingenieritza elektronikoa ari da ikasten eta Jon Zarautz gizarte langintza. «Ez da ikasketa unbertsitariorik egin behar, partehartu dezakezu beste ikasketa motak egiten ari baldin bazara. Ikaslea izan behar da derrigorrez».
«Youtuben izan nuen lasterketaren berri»
Bitxia da nolatan sartu diren bi hernaniarrak abentura honetan. Jon Zarautzek kotxe zahar bat erosi eta gero etorri zen ideia. «Youtuben bideoak ikusten ari nintzen kotxe zahar hori konpontzeko eta Uniraideko bideo batekin topatu nintzen eta gogoa sartu zitzaidan. Gustatu eta interesa sortu zidan».
Koadrilakoei esan eta Axeli ere harra sartu zitzaion. «Bideo gehiago ikusi nituen eta unibertsitateko batek partehartu zuela ikusi nuen. Berarekin kontaktuan jarri ondoren gehiago berotu ginen eta izena eman genuen. Proiektuarentzako diru guztia guk jarri behar dugu. 4.000 euro baino gehiago eta esponsorrak bilatzen ari gara».
Lasterketa ere bada, nahiz eta ez izan abiadurakoa. «Azken egunera arte ez dizute esaten zenbat denboran egin duzun ibilbidea. Ez da lehiakortasuna bultzatzen. 150 kotxe gaude, baina taldetxoak egiten dira, elkar laguntza dago».
Egun osoa egoten dira kotxean sartuta. «Mugikor bat ematen digute, jakiteko denbora guztian non gauden. Galtzea oso erraza da, eta seguru asko, askotan ibiliko gara galduta. GPS hori erabiliko da jakiteko zenbat kilometro egin ditugun, baina inoiz ez mapa bezela. Nabegazioko etapak dira brujularekin egiten ditugunak, roadbook-arekin goaz».
«Atlas mendietan elurra eta basamortuan hotza eta beroa izango ditugu»
Hori bai, hiru egunetan hotelean pasako dute gaua, beste lau egunetan basamortuan antolatutako kanpamenduetan eta maratoi etapan, vivac askean.
«Laguntza mekanikoa edukiko dugu, kotxeak arazoak emango baititu seguru»
Asistentzia eta laguntza izaten dute arazoak izanez gero. «Mekanikariak ez gara. Antolakuntzak badauzka eta taldeen artean laguntzen gara. Beste talde euskalduna mekanikariek osatzen dute. Hala ere, argi dugu arazoak agertuko direla, apurtuko da kotxea seguru».
Eguraldiak ere badu zer esana. «Goazen garaian gauean hotz haundia egingo du eta egunean zehar beroa egingo du, baina jasangarria da. Hilabete bero batean ezingo litzateke egin». Taldeak badu izena Awqasisa eta proiektuan lagundu nahi duenak 658 750 870-627 100 236 telefonoetara deitu dezake edo jonzarautz7@gmail.com eta axelja6@gmail.com helbideetara idatzi daiteke laguntza eskaintzeko.
Kanpamendu sahararretara hurbiltzea ez dute uzten. «Algeriara ezin dugu pasa, hala ere nomada asko dabil eta horietako asko sahararrak dira. Helikopteroa segituan agertzen omen da mugara hurbiltzen baldin bazara».
Etxekoen animoak ere jaso dituzte, nahiz eta hasieran ez sinetsi. «Honelako esperientziak behin bizitzen direla eta aprobetxatzeko esan digute. Uniraiden kamixetarekin ikusi gintuztenean, esan ziguten: bazoazte, ezta?».
IBILBIDEA
Lehenengo eguna: Otsailaren 23an, larunbata. Tanger-Meknes.
Bigarren eguna: Otsailaren 24an, igandea. Meknes-Rich.
Hirugarren eguna: Otsailaren 25ean, astelehena. Rich-Erg Znigui.
Laugarren eguna: Otsailaren 26an, asteartea. Erg Znigui-Erg Znigui.
Bosgarren eguna: Otsailaren 27an, asteazkena. Erg Znigui- (maratoi etapa).
Seigarren eguna: Otsailaren 28an, osteguna. (maratoi etapa-Nkob).
Zazpigarren eguna: Martxoaren 1ean, ostirala. Nkob-Marrakex.
Zortzigarren eguna: Martxoaren 2an, larunbata. Marrakex-Marrakex.
Bederatzigarren eguna: Martxoaren 3an, igandea. Marrakex-Tanger.