hernaniko 21garren Igeriketa saria gaur izango da, 16:00etan hasita, kiroldegian. Azken urteetan Eguberrietan ospatzen da eta gaur dute zita inguruko igerilariek. Urtero bezala Hernani, Buruntzaldea eta Tolosaldeako igerilariak arituko dira eta aurten Fortunako infantil taldearen delegazio bat ere etorriko da.
Tolosaldeak eta Buruntzaldeak talde sendoa ekarriko dute Hernanira, Espainiako Txapelketetan aritzen diren igerilariekin. Fortunan ere badaude maila haundiko igerilariak eta horien artean dago Enaitz Goñi hernaniarra. Hernaniko taldeko igerilariak; Xabier Huitzi, June Garmendia, Uxue Garmendia eta Intza Pagola esperientzia hartzera eta denborak hobetzera irtengo dira.
Eskolar eta federatu txapelketa da eta sariak bi mailetan banatuko dira. Alde batetik infantil sailkapena egongo da eta bestetik nagusiena. Igerilariek egiten duten denborari FINA puntuak emango dizkie eta horren arabera egingo da sailkapen nagusia.
Bertan, 100 metroko proba guztiak egingo dituzte igeri (100 tximeleta, 100 bizkar, 100 bular, 100 libre eta 100 estiloak) eta 4x50 libreak errelebotan.
Halaber, igeriketa txapelketa dela eta, abenduaren 29an, larunbata, igerilekuak itxita egongo dira arratsaldean.