Pasa den asteburua orokorrean ez zen ona izan hernaniko pelotarientzat bost partidu bakarrik irabazi baitzituzten hamabost jokatu eta gero. Hala ere, lortu ziren garaipenak garrantzitsuak eta balio haundikoak izan ziren.
Gipuzkoako Trinkete Txapelketan Jon Jara finalaurdenetara sailkatu da, kadete mailan, Oiarpeko ordezkariari erraz irabazi eta gero. Aurretik, maila honetako beste hiru pelotari sailkatu ziren azken faserako.
Bestetik, Iñigo Labakak galdu egin zuen Mundarroko Oier Gurutzealderen aurka eta ezin izan du finalerdietara sailkatu. Eta gainera, hurrengo asteburuan maila ez galtzeko partidu erabakiorra jokatu beharko du.
Altzako Torneoan Ioritz Arrietak, Mundarroko Jokin Santxezekin batera, finalera sailkatzea lortu zuen. Finalerdian 22-18 irabazi zieten Ongay eta Gorritiri. Finala Errege Egunez, urtarrilaren 6an jokatuko da.
Hernaniko Eguberri Torneoan lau pelotari hernaniarrek jokatuko dute finala. Igande honetan jokatuko dute, finaleko joanekoa, Salaberria-Insaustik, Arizmendi-Altunaren aurka eta itzulerakoa urtarrilaren 5ean jokatuko da.
Santo Tomasetan, Trinitate Plazan, jokatutako txapelketan CD Hernaniko Ainhoa Urienek, Vicariorekin batera, 22-21, irabazi zuen txapela Badiola-Eizagirreren kontra.