Hiru talderen kontzertua izango da bihar larunbatean, Biteriko areto nagusian, gaueko 21:00etan. Disko berria aurkeztuko dute Bloody Brotherhood eta Meltdown talde hernaniarrek, eta Liher taldea gonbidatu dute, haiekin. Kontzerturako sarrerak salgai daude, 7,5 euroan; baina hiru sarrera bikoitz zozketatuko dituzte Doberak eta Kronikak, apuntatzen diren Kronikalarien artean. Horretarako: Kronikaren bulegotik pasa (Larramendi 11), 943 33 08 99 telefonora deitu, edo idatzi kronika@kronika.eus helbide elektronikora.
Bloody Brotherhood taldeak, gainera, bere azken diskoko abestiak aurkeztuko ditu. «Oraindik kaleratu gabe dago, urtarrila eta otsaila artean aterako dugu kalera, baina Biterin bertako kantak joko ditugu», diote Imanol eta Juanek. Taldeko bi kide dira eta hirugarrena Alberto da.
«Don’t break the circle izena du diskoak eta Deepsheepproductins ekoiztetxearekin batera argitaratuko dugu», diote taldekideek. Talde hernaniarra herrian ezaguna da, hainbat kontzertu eman baititu aurretik. «San Joanetan bi, Latxunben, Zikuñagan beste bitan... eta orain, Biterin estreinatuko gara, nahiz eta beste herri batzutako kultur etxeetan aritu izan garen: Larratxon, Intxaurrondon, Bermeon».
Beraiek izango dira lehenengoak taularatzen. «Esan digute 45 minutu inguruko kontzertua eskaini behar dugula. Gero datoz beste biak».
Bloody Brotherhood Metal taldea da; zehazki, Death generokoa. Estilo hau 80ko hamarkada hasieran sortu zen Floridan (AEB). «Thrash Metalari erantzunez sortu zen. Thrash Metala kaletarragoa eta urbanoagoa da, eta Death Metalaren ezaugarri nagusiena da iluna dela, baita abiadura ere», diote Bloodyko taldekideek.
Eta Floridatik Floridara, Hernaniko auzoan egiten dituzte entsaioak eta grabaketak. «Meltdown taldearen ondoko lokalean. Bizilagunak gara».
Kanpoan jarraipen gehiago duen musika mota
Diote Euskal Herrian Death Metal estiloa ez dela oso ezaguna eta jarraitua, baina «behin Iparraldera pasa eta berehala, Europa osoan indar haundia duen musika mota da.
Hemen baino askoz ere gehiago. Euskal Herrian beste musika mota batek du arrakasta, baina gero talde horiek irten eta ez dira batere ezagunak. Death Metalarekin alderantziz gertatzen da; kanpoan du jarraipen haundiagoa. Guk jarraitzaile gehien Bilbon, Gasteizen eta Iruñean ditugu».
2011n sortu zen taldea eta beraien lehenengo maketa 2012an editatu zuten. Horrez gain, Ritual of blood lehenengo diskoa 2015an argitaratu zuten. «Bira egin genuen lehenengo diskoarekin. Portugalen, Espainian, Frantzian.... eman ditugu kontzertuak; Suediatik ere deitu ziguten eta Europan zehar bira egiteko ere bai. Hala ere, ezin izan genuen joan. Diru asko da eta hemen laguntzarik ez dugu jasotzen. Suedian, esaterako, gutxieneko soldata ematen diete taldeei entsaio kopuru batengatik, eta kontzertuengatik, plusa. Eta bira egiten badute, are gehiago. Horregatik kanpotik horrenbeste talde etortzen dira, eta alderantziz, hemendik kanpora gutxi joaten dira».
Euskal Herrian, Dima Metal Fest-a ezaguna da eta bertan partehartzen dute. «Izugarria da. Udaletxean ongietorria egiten digute taldeei pankarta batekin. Herriko umeak eta helduak Dima Metal Fest kamixeta beltzekin ibiltzen dira. Udaletxeak ordaintzen du dena, lau eszenatoki jarri zituzten eta guk egur gehien zegoenean jo genuen».