Atseden hartu baino, partidu gehiago ari dira jokatzen Hernaniko palistak, Gabonetako oporraldian. Lau torneotan ari dira, eta lauetan sailkatu da hernaniarren bat, finalera.
Astelehenean jokatu zuten Adurtzako Txapelketaren finala, Ekhiñe Balerdik eta Garazi Urdangarinek, semifinala 30-19 irabazi ondoren. Baina txapela janzteko lehian, etxeko taldea, Adurtzako bikotea, nagusitu zitzaien (23-30). Indartsu hasi zuten finala hernaniarrek, eta bost tantoren aldea ere hartu zuten. 21garren tantora arte izan ziren aurretik, baina gero, Adurtzakoek pelota aldatu zuten, oso bote motzekoa aukeratuz, eta horrek min egin zien hernaniarrei.
Irazustabarrena eta Huizi, hiru finaletan asteburuan
Sasoi betean daudenak, Amaia Irazustabarrena eta Maider Huizi dira. Asteburu honetan daukate Kinieletako Torneoaren finala, Munduko Pilota Batzarrak antolatuta, larunbat goizean Sopelan. Baina ez dute bakarra izango, beste bi jokatzeko sailkatu baitira.
Larunbat arratsaldean, larruzko paletako Bizkaia Torneokoa jokatuko dute, eta aurrean izango dute Amaia Araiztegi, Maider Mendizabalekin. Ligaxkako hirugarren jardunaldian, hiru setetan irabazi zieten Irazustabarrenak eta Huizik (8-3, 8-4 eta 8-3), Martin eta Saezi, sekulako joku ona erakutsita.
Eta igandean, Sakanako Txapelketako finala jokatuko dute Irazustabarrenak eta Huizik, elkarrekin hori ere. Semifinalean, 25-12 nagusitu zitzaizkien hernaniarrak Aristorena eta Ruiz de Larramendiri, joan den igandean, Etxarri-Aranatzeko frontoian.