Komedia beltzarekin bukatuko du urtea, Zinea euskaraz! egitasmoak, Dobera Euskara Elkartearen eskutik. Urte berri on, amona! pelikula jarriko dute gaur, Sandiusterrin, arratsaldeko 18:30etan hasita.
Telmo Esnalek zuzendutako filma da, eta 107 minutuko iraupena dauka. Zahartzaroaren gaia lantzen du, ikuspuntu komiko batetik. Mari amonak (Montserrat Carulla) Maritxu alabaren (Kontxu Odriozola) arreta osoa bereganatzen duela eta, Maritxuren senarrak, Joxemarik (Pedro Otaegi), erabaki du amona zaharren egoitza batean sartzea. Baina Maritxu konturatu gabe egin beharko du hori, Kintxo suhiaren (Josean Bengoetxea) laguntzaz. Lan erraza dirudiena, ustekabeko ondorioak ekarriko dituen lehia bilakatuko da azkenean, amonaren izaera tarteko.
Sarreraren truke, borondatea eskatuko dute.