35garren edizioa zuen aurtengoa, Hondarribiako Bordari eta Satarka literatura lehiaketak. Abenduaren 15ean banatu zituzten sariak, eta horietako hiru, bi hernaniarrentzat izan ziren: Iñigo Legorburu eta Iñaki Sanz-Azkuerentzat.
Satarka poesia lehiaketan nagusitu da Legorburu, Poema konfabulatuak lanarekin; eta honekin, bost urtez jarraian lortu du sari nagusia. «Umeen ipuinetako pertsonaiekin fabulatu dut, Hansel eta Gretel, Gulliver, Txanogorritxu eta beste hainbat; eta etorkizun distopiko batean txertatu ditut, errealitatea eta fikzioa nahastuz», azaldu du Legorburuk. 800 euroko saria, oroigarria eta poemen argitarapena lortu ditu.
Sanz-Azkuek, berriz, bi sari jaso ditu, Bordari ipuin lehiaketan. Bigarren sari nagusia eskuratu du berak, eta horrekin batera, Hondarribiako onenaren saria, bertan bizi baita hernaniarra. Kontrolpean izeneko lana aurkeztu zuen, eta kontatzen ditu, genetikaren munduko gizonezko katedradun baten gorabeherak: «sagardoaren munduan dabilen beste gizon batekin oheratuko da, eta horren ondoren, bere bizitzaren kontrola eta deskontrola nola kudeatu behar dituen ikasi beharko du, bere argilun guztiekin», azaldu du egileak. 400 euroko bi sari lortu ditu, beste bi oroigarri, eta bere lana ere argitaratuko dute, Legorburu eta beste sarituenekin batera. Guztira, 41 lan aurkeztu zituzten lehiaketara: 22 poesian, eta 19 narratiban.
Legorbururi beste sari bat, Gasteizko Afro elkarteak
Egun horretan bertan, beste sari bat ere jaso zuen Legorburuk berak, Gasteizen, Afro elkartearen eskutik, etorkin afroamerikarren bilgune dena. Narrazio lehiaketako bigarren saria eskuratu du Legorburuk. Emakumea eta migrazioa izan da aurtengo gaia, eta Bidean lana aurkeztu zuen hernaniarrak, Brasiletik Euskal Herrira emigratu behar duen emakume baten kasua landuz, hemen operatu dezaten. Identitate sexuala eta lan arloa uztartzen ditu narrazioak.
Bigarren postu horrekin, 250 euroko diru saria jaso du Legorburuk.