Gaur hasiko da torneo klasiko bat, Hernanin. Eguberri Txapelketa jokatuko dute, hiru astetan zehar, Pelota Eskolako 31 gaztetxok: 15 benjaminen kategorian, eta 16 alebinetan.
10:00etan hasiko da jaialdia gaur, benjaminen 20 partidurekin. Eta arratsaldeko 15:00etatik aurrera, berriz, alebinen beste 20 jokatuko dira.
Unai Alvarez bueltan, trinketeko banakakoan
Gainerakoan, Gipuzkoako Trinkete Txapelketan jokatuko dituzte partidu gehienak, hernaniarrek. Bereziki garrantzitsua da, Jon Jara kadeteak Oiarperen kontra jokatuko duena, bihar goizeko 10:45etan Gaskan. Irabazi beharra dauka Jarak, azken fasera sailkatu nahi badu.
Beste partidu inportante bat ere bada: Unai Alvarez bueltatuko da kantxara. Hiru aldiz munduko txapeldunorde izan denak, zenbait urte kantxetatik urrun egon ondoren, gaur jokatuko du aurreneko partidua, 10:30etan Gaskan. Binakakoan zen bueltatzekoa, baina Xabat Pagolaren lesioagatik, banakakoan ariko da, haren ordez.