«Egonkortasunerako bermea», alderdi sozialista

Eneko Andueza, Gipuzkoako sozialisten idazkari nagusia Hernanin izan zen atzo, Ricardo Crespo alkategaia eta PSE-EEko hainbat kiderekin. Bertan, Pedro Sanchez Espainiako presidenteak Kataluniara egindako bisitaz aritu zen, adierazteko «ekintzekin, eta ez esan hutsekin, arazoak konpontzeko dagoela erakusten» ari dela. Izan ere, azpimarratu zuen «historikoa» izan dela bertan bildutako Ministro Kontseiluak onartutako lanbide arteko gutxieneko soldataren igoera. Era berean, sozialistak «Euskadin ere egonkortasunerako bermea» direla nabarmendu zuen, eta Euskobarometroaren emaitzen arabera, «gizarteak baloratu egiten» duela. Hauteskundeetarako falta den arren, ondo ari direla argitu zuen.