Bestelako giroa ezagutu du Jenny Perlaza kolonbiarrak jaioterrian ospatzen dituzten Gabonetan. «Maitasunak» ekarri zuen Euskal Herrira, Hernanira, duela 7 urte, eta ospakizuna desberdina dela konturatu zen. «Hemen bezala ez, Ameriketan askoz gehiago ospatzen dira Gabonak!», dio.
Janaria aitzaki, lagunak elkartzeko
Cali hirikoa da Jenny Perlaza, Cauca bailarakoa, eta han «beltz zimarroien jakiak» ohikoak dira. Garai batean ‘zimarroi’ deitu zitzaien ihes eginda libre bizi ziren esklaboei. «Beltzek koko gehiago erabiltzen dute. Txerria, oilaskoa edo mariskoa jaten da, kokoarekin maneatuta. Haragi gorria zurien ohitura da gehiago. Cali zaporedunagoa da!».
Gabonetan are gehiago nabari da zapore hori dena. Asko jaten omen dira gozoak: «buñueloak, natillak, manjar zuria (esne gozoki edo ‘dulce de leche’ antzekoa), eta ardoa. Abenduan edaten da». Ohikoa dira, baita ere, indioilar betea, oilaskoa sagar saltsan, txerria arrozarekin betea... «Hori da gehien erabiltzen dena. Baina txerri haundia jaten dugu, ez txerrikumea, Euskal Herrian bezala». Plater horrek jende gehiagorentzako ematen du. «Oparotasun haundia izaten da. Baina janariak ez dauka Euskal Herrian bezainbesteko garrantzia! Bizilagunak bizilagunari eramaten dio janaria. Asko. Aiton-amonak ere oso garrantzitsuak dira; ama edo amonaren etxean biltzen da familia. Beraz, abenduaren 24an batzuekin bazkaldu eta besteekin afaldu dezakezu, eta gero, gaueko 12:00etan, kalera!».
Festa, «benetakoa»
Kaleko giro hori ikusgarria izaten dela dio. «Auzo batzuetan kaleak itxi egiten dira, eta kalean prestatzen dira jakiak, ikatzarekin; adibidez, txerri betea. Polbora, su artiizialak, musika... izaten dira. Gabonetako usaina egoten da. Musika ere desberdina da abenduan. Azaroaren 1ean hasten da Gabon giroa, eta abenduan musika aldatu egiten da. Eta kalean jendeak dantza egiten du. Baina dantza, benetan. Ez hemen bezala!», egiten du barre. «Eta negar ere egiten da, asko. Sutsua da kolonbiarra. Lehertzeko moduko nahasketa da. Asko maitatzen da elkar, Gabonetan; jendea elkartuta egoten da».
Hainbat ohitura gogoratzen ditu. Aginaldo Bederatzigarrena, adibidez. «Abenduaren 16tik 24ra, iluntzetan, umeak etxez etxe joaten dira goxokiak biltzen. Azken egunean opariak ematen zaizkie. Eta 24an opari eta jakiak ere ematen zaizkie kaleko umeei. Urtarrilaren 6an, berriz, kandelen eguna ospatzen da, kaleak kandelekin beteta. Kaleak dantza eta jakiz betetzen dira Gabonetan».
Epelean, bero
Kaleko epeltasunak festa berotzen laguntzen duela aitortzen du, hango Gabonak hemengoekin alderatuta. «Han beste tenperatura bat egiten du. Bogota hotzagoa da, baina hotz goxoa egiten du. Cali beroagoa da. Baina Gabonetan, ez da abuztuan edo El Niño fenomeno meteorologikoaren garaian bezain beroa!».
Epeltasun horrek elikagaietan eragiten du. «Han zuku asko edaten da; ‘jugo’ esaten diegu. Gabonetan beti izaten da lulo zukua». Antzekotasunak ere badira, ordea. «Tamalak asko jaten dira; hemengo taloen antzekoa da masa hori. Auzoetan asko jaten da. Eta ‘sancocho’ ere egiten dugu; salda. Baina arina, oilasko, patata eta martorriarekin (cilantro); batez ere, festaren ondorenetik errekuperatzeko!». Esnatzeko onena, bestela, kafea. «Kulturaren parte da! Tintoa eskatuz gero, esnatzeko kafe argia aterako dizute».
ERREZETA: CAUCA BAILARAKO TAMALA
OSAGAIAK:
= Tamalak (taloen antzekoak) egiteko masarako artoa, edo egindako masa (egina erosi daiteke).
= Platano hostoak.
= Txerri haragia eta oilasko izterrak.
= Tipula.
= Baratxuria.
= Aji piperra.
= Piperrautsa.
= Oreganoa, ezakaia (tomillo), gatza, kuminoa, azafraia eta nahi izanez gero, beste bizigarriren bat.
= Zalke (arveja) ilarra.
= Tomate zuritu eta zatikatua.
= Azanarioa.
= Patata.
ERREZETA:
TAMALA PRESTATZEKO
= Masa uretan disolbatu; ez dadila lodiegi geratu.
TAMALA BETETZEKO
= Prestaketa lanen aurreko egunean, maneatu haragia tipula, baratxuria, gatza, piperrautsa, eta gainerako belar eta bizigarriekin, eta hozkailuan gorde.
= Sutan goxatu tipula, baratxuria, aji piperra eta piperrautsa. Gehitu tomatea, eta maneatu gatz, piperrauts, kumino eta azafraiarekin. Su baxuan utzi ordubetez (hogao saltsa deitzen diote).
TAMALA OSATU
= Bi platano hostoren gainean jarri, ordena honetan, arto masa, haragia, azanario xaflak, patata xaflak, eta busti dena hogao saltsa eta nahi diren bizigarriekin.
= Hostoen puntetatik helduta, bildu guztia, eta lotu pitarekin.
= Hosto bete horiek egosi ur pixka bat daukan ontzian, bi orduz, tapa jarrita, lurruna mantentzeko.