Pediatria zerbitzua berrezarri dezala eskatu diote goizuetarrek, azkeneko asteotan, Nafarroako Osasunbideari. Eta eskaera horri batu zaizkio aranoarrak ere: elkarretaratzea egin zuten aurreko igandean, Aranoko gurasoek eta haurrek bat eginda, aldarrikatzeko beraiek ere behar dutela pediatria zerbitzua Goizuetara bueltatu dadila; «Aranotik 20 minutura», alegia.
Izan ere, diote «otsailetik ordu eta 40 minutuko joan-etorria» egin behar dutela herriko familiek, Leitzan artatuak izateko. «Leitza eta Lekunberri artatuko dituen plaza bete den arren, Goizuetan ez da zerbitzua lehen bezala berrezarri, eta Aranoko familiak ere, Goizuetakoak bezalaxe, oraindik ere Leitzako osasun zentroraino joatera behartuta gaude, gure haurrak pediatra batek artatu ditzan».
«20 minutuko bidaia bada nahikoa, hain oinarrizko zerbitzua jasotzeko»
Gaineratu dute, Aranon inoiz ez dela pediatrarik izan, eta Goizuetan jaso izan dutela zerbitzua, astean behin, bi herrietako 100 bat haurrek. «Nafarroan bezala, Estatu osoan ere arazoa omen da pediatra eskasia, eta arazo hori dela eta, zaila dirudi Goizuetara, eta are zailagoa Aranora, pediatra bat ekartzea. Baina hori horrela izanda ere, Aranoko familiek, Goizuetako protestak babestuz, eskatzen dugu pediatria zerbitzua Goizuetan mantentzea, 20 minutuko bidea bera badelako nahikoa denbora, hain oinarrizkoa den zerbitzu batera aukera duina izateko».
Nabarmendu dute, gainera, errealitate honen harira, Aranok Gipuzkoarekin duen gertutasunak beste errealitate bat ere azaleratu duela. Familia batzuek, Aranoko Udalari eskatu diote negoziaketa bide bat ireki dezala Nafarroako Gobernuko Osasun Zerbitzuarekin, «aukera izan dezaten, hala behar luketen familiek, Gipuzkoako anbulategietan pediatra espezializatea eskatzeko, gaur egun Osakidetza eta Osasunbidearen artean dagoen hitzarmenaren barruan».