Estreinako edizioaren arrakasta ikusita, bigarrenari ez diote hutsik egin nahi izan, 2019rako, EuskarAbenturaren antolatzaileek. Datorren urteko uztailaren 1ean, Maule Lextarretik abiatuko da, 150 lagunek osatutako espedizioa: 16-17 urteko 120 gazte, eta abenturan laguntzaile izango dituzten 30 heldu.
«Gure ametsa izan da, mundu osoko gazte euskaldunak batzea, esperientzia aberasgarri eta ahaztezin batean», azaldu dute. Eta hala izan da aurreneko urtean: 110 gaztek, probintzia euskaldunetakoak zein munduko hainbat txokotatik etorritakoak, oinez gurutzatu zituzten euskal lurraldeak eta zazpi hiriburuak, «gordetzen dituzten mila sekretu deskubrituz».
Izan ere, lau helburu nagusi dauzka, EuskarAbentura antolatzen duen taldeak: hizkuntza ohituretan eragitea, gazte euskaldunen sare bat sortzea, Euskal Herria ezagutzea, eta balore osasuntsuak transmititzea.
Izenematea zabalik, martxoaren 10era arte
Datorren urteko abenturan parte hartzeko, zabalik dago izenematea, martxoaren 10era arte. Internet bidez egin behar da, www.euskarabentura.eus web orrian sartuta. Bertan dago izenemate orria, eta hori betetzearekin batera, lan bat entregatu behar da. Sei lan-mota jarri dituzte aukeran: historikoa, literarioa, ikus-entzunezkoa, musikala, plastikoa eta sormen digitalekoa. Lanen gaiak ere zehaztu dituzte, eta hiru daude aukeran: Maite ditut, maite; Joan-etorriak: migrazioen testigantzak; edo Errimak eta erritmoak.
Motibazio gutuna ere entregatu behar da, apuntatzerakoan.
16-17 urteko gazteek hartu dezakete parte, eta apuntatzen diren guztien artean, aurkeztutako lana baloratu ondoren, 120 aukeratuko dituzte.
Baina gazteek bakarrik ez, helduek ere izango dute aukera, abenturan parte hartzeko. Izan ere, 30 helduk osatutako taldeak lagunduko ditu gazteak: begirale edo xerpak, erizainak, sendagileak, gidariak...
Plaza horiek betetzeko, antolatzaileek laster zabalduko dituzte lan eskaintzak, eta horietara aurkeztu dezakete beraien hautagaitza, abenturan parte hartu nahi duten helduak. EuskarAbenturaren web orrian, sare sozialetan eta lansarean argitaratuko dira horiek.
483 kilometro oinez, zazpi hiriburuak lotuz
Maule Lextarretik abiatuta, Santiagora dijoazen bide desberdinetatik ibiliko dira abentureroak. Guztira 783 kilometro egingo dituzte; eta horietatik 483 kilometro, oinez.
Zazpi probintziak igaro, eta zazpi hiriburuak lotuko dituzte: Maule Lextarretik Donibane Garazira, handik Iruñara, Gasteiz, Baiona, Donostia eta Bilbo, uztailaren 31n, hilabeteko abentura bukatzeko Getxon.