Dena prest daukate Goizuetan, Gabonei hasiera emateko. Eta aurreneko ekintza berezia, bihar bertan izango dute, elizan. Gabonetako kontzertua eskainiko dute bertan, herriko gaztetxoek eta Umore Ona abesbatzako kideek, kantuan, Hernaniko Doinu Zale akordeoi bandak lagunduta. Eguerdiko 12:45etan izanen da hori, data seinalatuei aurreneko nota eta doinuak jartzeko.
Behin giroa piztuta, astelehenean eginen du herrira bisita, urtero bezala, Olentzerok. Eta hiru bider eginen du kale buelta. Goizeko 11:00etan aterako da Xalto eskolako guraso eta ikasleekin, Gurasoak elkarteak antolatuta; eta herrian barrena ibili ondoren, Plazan bukatuko dute, salda hartu eta hamaiketakoa eginez.
Bazkalostean, berriz, presoen aldeko kale buelta eginen du Olentzerok, 15:00etan abiatuta, etxez etxe eta tabernaz taberna, iluntzera arte.
Eta azkenik, 18:00etan ospatuko dute Olentzero eta Mari Domingiren etorrera. Plazara iritsiko dira, eta kalejira eginen dute herrian barrena, frontoian bukatzeko. Bertan elkartuko dira haurrekin, haien gutunak jaso eta goxokiak banatzeko.
Errege Magoek, berriz, urtarrilaren 5ean eginen dute bisita Goizuetara, Gurasoak elkarteak antolatuta. Arratsaldeko 18:00etan sartuko da kabalgata, herrian.
Baina Olentzero eta Errege Magoen artean, tailerrekin gozatzeko aukera izanen dute gaztetxo goizuetarrek. Bi saio eginen dituzte eskolan, 3-14 urtekoentzat: abenduaren 26an eta 27an, 10:00etatik 13:00etara. Hirugarren saio bat ere eginen dute, Aranoko Maisuenean, 28an. Aurrez eman behar zen izena, tailerretan parte hartzeko.
17 lagun, errege opila egiten
Joan den larunbatean, berriz, sukaldaritza ikastaroa izan zen, Xalto eskolako jangelan. 17 lagun elkartu ziren, eta Cebank ostalaritza eskolako Bidatz Barrenetxea hernaniarraren eskutik, errege opila egiten ikasi zuten. Elkarrekin egin zituzten bi opil, natarekin eta kremarekin betetako bana: «oso goxoak atera dira biak!», nabarmendu zuten. Eta datorren urterako ere, ikastaroa errepikatzea eskatu zuten bertaratuek.
Argiak jartzearen alde, bozkatu dutenen %82a
Baina opilak bakarrik ez, Gabonetako argiak ere prest dauzkate Goizuetan. Aste honetan jarri dituzte, Udalak luzatutako inkestan, hala erabaki baitzuen gehiengoak. Argiak jartzea nahi zuten edo ez galdetu zien herritarrei, eta 88 lagunek erantzun dute inkesta. Horietatik, 72 lagunek eman zuten baiezkoa (%81,8); 10 lagunek ezezkoa (%11,4); eta sei lagunek berdin zaiela (%6,8). Hortaz, herritarrek hartutako erabakiari erantzunez, argiak jarri ditu Udalak.