Gabonak direla aprobetxatuz, ohe elastikoak jarriko ditu Astiko Astigarragako Merkatari, Ostalari eta Zerbitzuen Elkarteak, Egin salto! Astigarragako merkataritza eta ostalaritzara! kanpainaren barruan. Hala aurkeztu zuten Astiko elkarteko kideek pasa den asteazkenean.
Sarrerak, elkarteko denda eta tabernetan
Hilaren 27tik 30era jarriko dituzte, hau da, hurrengo ostegunetik igandera bitarte, Joseba Barandiaran plazan, goiz eta arratsaldeko ordutegiarekin: goizez, 11:00etatik 13:30etara; eta arratsaldez, 17:00etatik 20:00etara. Bertan ibili ahal izateko, sarrera eskuratu beharko da saltokietan erosketa edo kontsumizio baten truke.
Ekimenaren helburua da «herri bizitza suspertu eta Astigarragan bertan dagoen merkataritza, ostalaritza eta zerbitzu establezimendu aukera zabala ezagutzera ematez gain, Gabon garaian ere herrian bertan kontsumitzearen garrantzia azpimarratzea».