af NDANZA talde afrikarrak Hernanira ekarriko du bere ikuskizuna gaur. Dantza garaikideko talde afrikarra da eta bere ikuskizunean afrikar dantzak, doinuak, mimoa eta antzerkia uztartzen dira. Ikusgarria da gaur, 20:00etan, Sandiusterrin ikusi ahalko den espektakulua.
Sarrerak www.ticketea.com web gunean lortu daitezke eta Sandiusterri bertan ordubete lehenago. 10 euro balio du eta diru sarrerak Música para salvar vidas proiekturako bideratuko dira. Proiektu honek Ugandako umezurtzak laguntzen ditu musikaren bitartez ikasi eta hazteko. Dantza ere erabiltzen da herrialdean etorkizun hobeagoa garatzeko.
Ikuskizunaren lehenengo atalean, Afrika bera irudikatzen da orokorrean kontinenteko irudi eta koadroen bitartez. Bigarren partean antzerkia eskaintzen da, non emakumeen mutilazioa salatzen den.
«Txundigarria sortzen den efektua»
Dena gorputzarekin egiten dute, argazkien edo tresnen erabilpenik gabe. «Txundigarria omen da sortzen den efektua» diote antolatzaileek.
Koreografiarekin irudi ederrak osatzen dituzte dantzariek, ikusleentzako momentu paregabeak eskainiz.
Hernanin aurretik Aba Taano gospel taldea entzun ahal izan zen, pasa den uztailean elizan hain zuzen, eta Af Ndanza taldea eskola berdinean garatu da Ugandako Kampala herrian. Bai batzuk eta bai besteak aritzen dira Musica para salvar vidas proiektuan.