Luze jo zuen astearteko Plenoak. Aurkeztutako bi mozioen irakurketarekin hasi ziren, 2019rako aurrekontuak eta Euskara Planaren VI. Plangintzari heldu aurretik.
Iruña-Veleiari, irtenbidea
Aurreneko mozioan, herritarrek eskatu zuten Iruña-Veleiako auzia argitzea. Bederatzi urtez instrukzio fasean egon den auzia da, eta 2018ko maiatzaren hasieran jaso dute auzipetuek, Eliseo Gil eta Oskar Escribanok, akusazio-idatzia.
Orain Hernani, epaiketa bukatzean apelazioetarako tartea egongo dela ulertuta, abstenitu egin zen, eta gainontzeko alderdiek mozioa onartu zuten.
Justicia Poetica elkartea, Kote Cabezudo auziaz
Bigarren mozioa, Mario Diez Fernandez abokatua lehendakari den Justicia Poetica elkarteak aurkeztu zuen, Kote Cabezudo auzia deitutakoaren inguruan, akusazio partikularra gehitu nahi izan zuen herritarrarekin batera.
Bertan, besteak beste, eskatu zen «gaitzespen sendoena adieraztea pertsonen sexu-kaltegabetasuna urratzen duen ekintzen aurrean», eta era berean, «biktimei eta kaltetuei elkartasun eta laguntza (...) helaraztea, sexu-abusuengatiko prozesu judizial orok biktimari jasanarazten dion trantzea» kontuan hartuta.
Musika Eskolarako lanaldi murriztuan 8 plaza sortuko dira.
EH Bildutik Garazi Etxarri zinegotziak adierazi zuen «indarkeria matxista lehen mailako arazoa» dela eta adierazpenaren alde zeudela. EAJ eta PSE-EE ere alde agertu ziren, eta OH abstenitu egin zen, «laguntza instituzionala Hernanin eskatzea ulertzen ez» zutelako eta «elkartearen helburua zein den» ere ez dakitelako. Mario Diez Fernandez abokatuak adierazi zien «elkartearen sorrera berria» delako webgunean informazioa falta dela, baina «biktimak ordezkatzen bost urte» daramazkiela. «Birala egin zen bideoa argitaratu nuenetik 28 biktima ordezkatu ditut. Gure asmoa da udaletxe guztiek adierazpen instituzioanala onartzea, urte hauetan isiltasuna besterik ez baitugu ikusi, eta ez dugu ulertzen». Denera, «bide judizialetan 17 auzi penal» daudela azpimarratu zuen, eta «aurreneko biktima 1988koa» dela. Zenbat egon daitezkeen ez dakitelako herriz herri babes eske jo dute.
Postu berriak, RPTan
Hurrengo puntuan Udal Lanpostuen Zerrenda, RPTa aldatzea onartu zen EH Bilduren aldeko eta EAJ eta OHren kontrako botoekin, eta PSE-EEren abstentzioarekin.
Besteak beste, Musika Eskolan 8 plaza sortuko dira lanaldi murriztuan, udal euskaltegian beste plaza bat sortuko da, herri lanetarako lorezaina erretiratzean ur eta argi postua aterako da eta udaltzain ofizial lanpostua sortuko da. OHk «ahalegina ona» dela iritzi zuen, baina «behar lukeenetik urrun» dagoela. PSE-EEk prozesuen inguruan galdetu zuen, eta Luis Intxauspe alkateak argitu zuen «orain RTPan jaso eta 3 urteko epean hornitu» beharreko postuak direla, eta Enplegu Planean zehaztuko dela nola. EAJ kontra agertzearen arrazoien artean, berriz, «lansarien maila bajua» azpimarratu zen.
Galarretan eta Karabelen, inbertsioak
2019ko 32.300.000 euroko udal aurrekontuari* dagokionez, EH Bilduren aldeko eta oposizioaren kontrako botoekin onartu zen. Sozialistek hainbat puntutan «sintonia» lortu izana azpimarratu zuten, baina udal gobernuaren proiektua «ez da gurea», azaldu zuten. EAJk ere proposamenarekin bat ez zetorrela azaldu zuen, eta OHk «kudeaketan arduragabekeria» egotzi zion udal gobernu taldeari.
Besteak beste, udal gobernu taldeak aurreratu zuen inbertsioak egingo direla Galarreta eremuan edota Karabeleko aparkalekuetarako obran, eta zerbitzu sozialari ekarpena %8 igoko dela, «alderdi guztien babesarekin», Xabier Lertxundik azaldu bezala.
Euskara Planak, eztabaida
Zalantza edo gaizki ulertuak Udaleko Euskararen Erabilera Normalizatzeko VI. Planaren inguruan sortu ziren. Herritarrek, nahi izanez gero, udaletxearekiko harremanak euskeraz izan daitezen bermatzea du helburu, Koro Etxeberria zinegotziak azaldu bezala. «Helburua da administrazioa euskalduntzea» gehitu zuen alkateak. EAJ alde agertu zen, eta PSE-EEk abstenitu egingo zela iragarri zuen, bozkatu baino lehen aldegin bazuen ere. OH hasieran kontra agertu zen, bando batzuk euskera hutsean argitaratu izanagatik. «Akatsa» izan zela onartu zuen alkateak, eta OH azkenean abstenitu egin zen. yy
*2019ko udal aurrekontuen inguruko erreportaje zabala, larunbateko Kronikan.