Musikarekin gozatzen segitzeko aukera izango da datozen egunetan ere, Gabonen aitzakian. Pasa den asteburuan ‘Hernani’ Musika Eskolako Hernasax eta akordeoi taldeak, herriko abesbatzak, eta Txistulari Banda entzuteko aukera izan zen, eta gaurtik aurrera ere, emanaldi gehiago izango dira.
Gaur, hain juxtu, ‘Hernani’ Musika Eskolako teklatu ikasleen emanaldia izango da, arratsaldeko 18:30etan hasita, Biterin (ordu erdi aurreratu da).
Horrez gain, musika eskolako ikasleek Gabonetako kale-buelta egingo dute ostiralean, Santo Tomas egunean, 17:00etan Plazatik abiatuta.
Abesbatzak eta Banda, asteburuan
Emanaldiek segida izango dute asteburuan. Hasteko, larunbatean elkarrekin ariko dira Hernaniko Musika Banda eta Ozenki abesbatza, eta Goizuetako Umore Ona abesbatza ere gonbidatu dute. San Joan Bataiatzailea elizan ariko dira, 20:00etan, Imanol Kamio, Jorge Pacheco eta Eneko Amundarainen zuzendaritzapean. Banda hasiko da aurrena, besteak beste, Guridiren Diez melodías vascas edo Beobideren Rapsodia vascarekin, eta abesbatzak ariko dira gero. Elkarrekin bukatuko dute denek.
Igandean, berriz, Kantuz abesbatza izango da emanaldia egingo duena. Eguerdiko 12:00etan Milagrosatik aterako dira, kale-jiran.
Hurrengo emanaldiak 24an izango dira. Olentzerorekin aterako dira herriko hainbat talde, eta Olentzerori harrera egin ondoren, Musika Bandak ohiko gabon gaueko erronda egingo du 20:00etan.