Bide onetik jarraitzen dute Mundarroko mutilek aste honetan ere 1-2 irabazi zuten Mundarroko mutilek larunbatean, Irungo Dunboa Eguzkiren kontra, haien etxean.
Talde lanari esker, beste hiru puntu poltsikoratu zuen taldeak. Eta azkeneko sei norgehiagokak irabazita, bigarren sailkatua da egun, Andoaingo Euskaldunaren atzetik.
Hasieratik, estutzen
Aurkariaren aurrean ondo kokatuta eta estutzen hasi ziren astigartarrak, eta horri esker, hamargarren minutuan lortu zuten aurreneko gola; Beñatek Iñurriri egindako pase on bati esker, azken honek erraz sartu zuena. Bigarrena ere, segituan sartu zuen Beñatek; aurkariaren defentsaren bizkarra harrapatu eta atezainaren gainetik gola sartu zuen. Kolpe horren eraginez, Dunboa astigartarrak estutzen hasi zen, deseroso sentiarazi arte.
Estutze-lan horrekin jarraitu zuten irundarrek bigarren zatian ere, eta horren saria izan zen partiduko gol bakarra. Gol horrek indarra eman zion aurkariari; baloi gehiago izan zituzten, eta baita aurkako zelaian presentzia haundiagoa ere. Dena den, horren aurka egin zuten moreek, eta gutxinaka lerroa aurrerago botatzen hasi eta lapurtutako baloi horietan arriskua egiteko sentsazioa eman zuten.