Emakumeenganako Indarkeriaren Aurkako Nazioarteko Eguna izaten da Azaroaren 25a, eta aldarria kalera eramateko ekintza bat antolatu zuen Udalak; «moduak» kritikatu ditu EH Bilduk: «Udalak lore banaketa egin zuen, herriko elkarteak baztertu eta kanpoko elkarte bat gonbidatuz».
EH Bilduk azaldu duenaren arabera, «ekimen honekin EAJk ‘Astigarragak indarkeria matxistaren aurka duen jarrera proaktiboa islatzeko modu aktibo eta dinamikoa’ ikusarazi nahi zuen, baina horretarako, Astigarragako herritar eta eragileak inplikatu beharrean, Donostiako txirrindulari talde bat ekarri zuen». Eta kritikatu dute: «EH Bilduk erabat lekuz kanpo ikusten du ekimen hau honela antolatu izana. Herrian txirrindulari talde eta kirol elkartea badaude eta hauek ez dute Udalaren aldetik inolako gonbidapenik jaso». «Herriko elkarte guztiei begirunea galdu eta mespretsuzko erabakia» dela uste du EH Bilduk.
«Herritarrak inplikatuz etengabe jarraitu behar da indarkeria honen aurka. Lore banaketa, herriko familiak eta haurrak inplikatuz gero, ekimen egokia izango litzateke», nabarmentzen dute.
Harituzi, eskerrak
Egun horren bueltan, baita ere, ekitaldia egin zuen Harituz elkarteak: «Udalaren ekimen gabeziaren aurrean, EH Bildurentzat pozgarria da, gizon eta emakumeen berdintasunerako herriko Harituz elkarteak ‘Indarkeria matxistaren aurkako matazak’ ekimenarekin egiten duen lana». Horregatik, «esker ona adierazi nahi die bertan burubelarri lanean ari diren emakume guztiei».
Mozioa, Plenoan
EH Bilduk jakinarazi du, baita ere, horren bueltan mozioa aurkeztu zuela Udalean: «helburua da balibide eta tresnak mahai gainean jarri eta indarkeria matxistaren aurkako udal-politikari hauspoa ematea da». Baina EAJk ez zuela plenora eraman: «hainbat ekimen interesgarri proposatzen zituen [...] Horietako asko aurreko urteetako mozioetan proposatu eta aho batez onartuak izan dira baina bat bera ere ez da martxan jarri».