Hernaniko Udalak Oroimen Historikoari buruzko jardunaldiak antolatu ditu. Gaurtik ostegunera arte, Oroimen historikoa berreskuratuz, 2018: Migrazioak, Hernanitik Hernanira migranteak izenburupean egitarau zabal bat antolatu du.
Hernaniko gizarteak XIX-XXgarren mendeetan zehar bizitutako migrazio-fenomeno horiek memoriatik berreskuratu nahi izan dira eta Horretarako egitarau zabala prestatu da.
Bi hitzaldi, erakusketa eta antzezlana
Gaur eta bihar bi hitzaldi eskainiko dira, 19:30etan Biterin. Lehendabizikoa, Joseba Etxarri kazetariak eskainiko du eta historian zehar Euskal Herritik joandako migranteak izango dira hizketagai Euskaldunak, emigrante izenburupean.
Bihar, asteartean, Jon Maia bertsolaria izango da hizlaria. Extremaduratik bertsolaritzara, integrazio istorio bat hitzaldia eskainiko du XX. mendean, Frankismo garaian, Euskal Herrira etorritako migranteak gaia hartuta.
Erakusketa ere egongo da gaurtik urtarrilaren 5era arte. Nahiz eta gaur zabaldu inaugurazio ekitaldia etzi, asteazkenean, egingo da Biterin, 20:00etan. Musikak girotuta Hernaniko gizarteak bizitako migrazioak irudi eta testuen bidez ezagutzera emango dira.
Jardunaldien barruan antzerkiarentzat tartea egongo da. Ligeros de equipaje. Crónica de la retirada antzezlana eskainiko da, ostegunean, Biterin 20:00etan. Gazteleraz da eta Huescako talde batek eskaintzen du. 1936-1939ko gerra garaian Frantzia aldera ihes egindako pertsonen esperientzietan dago oinarrituta.