Urtarrilera arte luzatuko da III. Umore Onako pilota txapelketa, eta martxa onean ari da egiten aurrera. Atzo jokatu ziren beste sei partidu, eta gaurkoan beste horrenbeste jokatuko dira, 16:00etan hasita. Asteburu honetakoekin, ligaxkaren ekuadorra pasako du txapelketak.
Etxeko txapelketaz gain, ordea, pilotari goizuetarrak ari dira beste hainbat txokotan ere lanean. Pasa den asteburuan, hain zuzen, Baztango txapelketan jokatu zuen Umore Onako Xanet Apezetxeak, Epleko Etxeberria bikote zuela. Finalean fin ibili ziren, baina azkenean, ez zuten txapela lortu. Azpitxapeldunen koparekin, ordea, gustora etxeratu ziren, lan ona eginda.
Mailaz maila bina, 22 urtez azpikoetan izan ezik
Gaurkoan, etxeko txapelketara itzulita, sei partidu jokatuko dira denera; 22 urtez azpikoetan izan ezik, mailaz maila bina.
Aurrena umeen mailakoak ariko dira, eta hernaniarren kontra ari beharko dute Umore Onako Alsua eta Salaberriak. Segidan, Bortzirietako bikotea Eplekoaren kontra ariko da. Kimuen mailakoek segiko dute gero: Hernani Añorgaren kontra aurrena, eta Oiarpe Ilunperen aurka, gero.
Bukatzeko, haurren mailakoak ariko dira. Ilunpe eta Hernani aurrez aurre lehenengo, eta Umore Onako Legarreta eta Elizegi gero, Aurrerako Biurrarena eta Mateorenaren kontra.
22 urtez azpikoak, berriz, atzo ziren jokatzekoak, kimuen eta umeen mailako beste bina partidu eta haurren mailako beste bat bezala.
Lehengo asteburuan jokatutakoei dagokienez, Umore Onakoek jokatu zituzten hiru partiduetatik bi irabazi zituzten, eta bat galdu.