Emakume palisten bilgune bilakatuko da gaur, Tolosako Beotibar frontoia, eta egun osoko festa egingo dute.
Aurrena, goizeko 10:00etan hasita, paleta txapelketa azkarra jokatuko dute hamar bikotek. Tartean izango dira, Hernaniko bi bikote: Amaia Alkorta eta Arantxa Gorostegi, eta Ane Diaz eta Maialen Garmendia.
Ligaxka jokatuko dute, eguerdiko 14:00ak arte, eta bazkaria egingo dute gero. Arratsaldeko 15:50etan bueltatuko dira, semifinalekin, eta 16:30etan jokatuko dute finala.
Amaia Irazustabarrenak, Emakumea Pilotariko finala
Eta final horren ondoren, beste bi ere jokatuko dira: Emakumea Pilotari txapelketakoak. Lehenengo mailakoa jokatuko du Amaia Irazustabarrenak, Miren Arrillaga usurbildarrarekin, Ane Maiza eta Maider Mendizabalen kontra.