Partidu garrantzitsua dauka Hernanik bihar, Ohorezko Mailan. Bartzelonaren kontra jokatuko dute, bigarren itzuliaren estreinako partidua, eguerdiko 12:30etan Landaren.
Baina ez da izango azkeneko aldia, elkarren kontra ariko direna: Kopako semifinalaren aurrerapena izango da biharkoa, partidu hori bera errepikatuko baitute finalerako txartelaren bila; Landaren, hori ere.
Beraz, ligarako puntuak pilatzeko bakarrik ez, Koparako ere baliagarria izango da: kontrarioari neurria hartu, animoak indartu... Ez dute lan erraza izango hernaniarrek, aurreneko itzuli bikaina osatu baitute kataluniarrek, eta laugarren daude. Baina garaipena bilatuko dute, Igor Genuaren itzulera ere aldeko dutela. Beharra ere badaukate: liga ondo hasi arren, jaitsierako postuetatik oso gertu daude berriro, 10garren postuan, Cisneros azkenaurrenaren puntu berdinekin.
Mikel Perez, aurreneko itzuliaren 15eko idealean
Bigarren itzulia hasiko du bihar Hernanik; baina hasi aurretik, aurreneko itzuliko jokalari onenak ere izendatu ditu Ohorezko Mailak. Zehazki, ligako 15eko ideala osatu dute, eta horien artean dago Mikel Perez hernaniarra, hirugarren lerroan.