Mendialdea Mankomunitateak herritarrak materia organikoa konpostatzera animatzeko kanpaina jarri du martxan: Erein ohitura, egin konposta. Helburua da Nafarroako Hondakin Legeak jarritako helburua betetzea; hau da, materia organikoaren %50 bereizita kudeatzea. Gaur egun, Mendialdea Mankomunitateak organikoaren %14 jasotzen du horrela.
Hala azaldu zuten orain gutxi egindako agerraldian Joseba Sanchez, Mendialdea Mankomunitateako Teknikariak eta Mankomunitateko udalerrietako ordezkariek; tartean, Ainhoa Ansa, Aranoko alkateak eta Unai Loiarte, Goizuetako alkateak.
Konposta egiteko, izena emateko deia
Hainbat arrazoi medio, auzo-konposta edo etxe-konposta egitera bultzatu nahi ditu Mankomunitateak herritarrak, eta izena emateko dei egin diete, 948 51 04 44 telefonora deituta.
Arrazoietako bat da, «sortzen dugun hondakinen ardura hartzea», eta era berean, Hondakin Legeak zabortegira isuritako zabor tonengatik ezarri duen kanona murriztea. Izan ere, Mankomunitateko batzarrak ekainean onartu zuen gai organikoa bildu eta kudeatzeko 2018-2020 planaren arabera, Mankomunitatean sortzen den materia organikoaren %100 konposta bidez bertan kudeatu nahi da, eta horrekin, gertuko ekonomia bultzau eta hondakinek Culebrete plantaraino egin beharreko 120 kilometroak saihetsiko lirateke.
Diseinua, Aranoko Alai Ondo Estudioarena
Kanpaina honez gain, konpostarekin erlazionatutako ekintza gehiago ere eginen ditu Mankomunitateak, eta horietarako erabiliko den irudia ere aurkeztu zuten, agerraldi honetan.
Diseinua Aranoko Alai Ondo Estudioak egin du, eta datozen urteetan erreferentiazkoa izanen dela azpimarratu dute.