Triptikoak banatu ditu Astigarragako Udalak etxez etxe, aste honetan, animaliak edukitzeko ordenantzaren inguruan. Zehazki, jasotzen ditu «animaliekin erantzukizunez jarduteko arauak», herritarren eta txakurren arteko elkarbizitza egokia izan dadin.
Horrela, adierazi dute, txakurren jabeek derrigorrez identifikatu eta erroldatu beharko dituztela animaliak, hiru hilabete baino lehen, edo erosi den momentutik hilabeteko epean. Txipa erabiliko dute, animalia identifikatzeko. Osasun kartila ere izan beharko dute animaliek, jabearen zein animaliaren datuekin, txertaketa eta desparasitazazio datekin, eta bestelako datuekin.
Eta arriskutsuak izan daitezkeelako katalogazioa daukaten txakurren kasuan, derrigorrezkoa da Lurralde Erregistroan erroldatzea. Horretarako, udaletxean entregatu behar da dokumentazioa.
Bide eta leku publikoetan, txakurrak lotuta
Bizikidetza arauei dagokienez, zehaztu dute txakurrek uhal batekin lotuta joan beharko dutela, herriko bide eta leku publikoetan; eta derrigorrezkoa dela txakurren kakak jasotzea.
Arau horiek betetzen ez dituztenek, arau-urratze arinak egingo dituzte, eta 60 eurotik 750 eurora bitarteko isunak jaso ditzakete.
Txakur parkeak eta libre ibiltzeko eremuak, herrian
Herrian, hala ere, badira txakurrak libre ibiltzeko hiru eremu: Murgia Parkea, Mundarro plaza eta Pagoaga plaza. Ordutegi jakin batean ibili daitezke libre: neguan, 19:00etatik 10:00etara; eta udan, 21:00etatik 09:00etara. Egun osoan zehar ibili ahal izango dira libre, herriko bi txakur parkeetan: Ergobiako errotondakoan, eta Donostia ibilbidekoan, Astigarragara sartzeko errotondan. Laster, 800 metro karratuko beste bat zabalduko dute, Urumea Berriko ibai parkean.
Eremu horietan, aske utzi ahal izango dira txakurrak, baina jabeak arduratu beharko dira txakurren portaeraz, eta haien kakak, berdin-berdin jaso beharko dituzte.