Hernaniar asko dira jada, Gabonak herrian pasa beharrean, oporretan, etxetik kanpo, ospatzen dituztenak: «duela urte batzuk agian ikusten ez ziren gauzak egiten dira egun».
Daten arabera, hiru tendentzia mota ageri dira: «batzuk, abenduaren 24-25a pasatzen dute kanpoan, eta gainontzekoa hemen, edo Gabonak hemen pasa, eta urtarrilaren 1etik 6ra arte dijoazenak ere badaude, baita gabon gaua eta urte zahar gaua, bi fetxa nagusienak, kanpoan pasatzen dituztenak ere», azaltzen dute.
Eta destinoak ere, anitzak dira. Batetik, eguzki bila dijoazenak daude: Kanariar uharteak, Caribe eta Cuba. «Hauek familia-planak izaten dira, gehienetan; eta astebete edo 10 egun joan ohi dira», diote.
Azkenaldian ere, Gabonekin oso lotuta dauden hiriburuek arrakasta haundia daukate: New York, Londres, Amsterdam, Praga... «Gabonetako azokak» direlako bultzatzen ditu asko eta asko, destino hauek aukeratzera. Baina Europan horiek bakarrik ez, «Aurora Borealen garaia da, eta Noruegara ere joaten da jendea, garai honetan ekintza asko antolatzen dituzte-eta!»
Oparietan ez ezik, datorren urteko oporretan pentsatzeko unea da urte bukaera.
Eta Latinoamerikara, eta bereziki, Argentinara ere joaten da baten bat: «bertan udara baita!».
Baina kanpora bakarrik ez, estatu mailan ere, jendea mugitzen dela diote: «garai honetan barruko turismoa kostakoa baino gehiago izaten da: hotel bitxiak (gaztelaniaz, ‘Hoteles con encanto’) hemen gertu, hala nola Errioxan, Kantabrian edo Nafarroan; bainu-etxeak edota paradorrak». Horrez gain, urte zahar gauean «egonaldi motzak» ere izaten dira, gertu.
Oparitzeko unea, ere bai
Baina bidaiatzeko unea bakarrik ez, bidaiak oparitzekoa ere badira Gabonak, eta horren inguruan badakite Hernani Bidaiaken. Azkenaldian, bidai-kofreak oso modan daude, eta horietakoak badituztela diote Hernani Bidaiakeko arduradunek. Dena den, beraiek sortutako pertsonalizatutako planak gomendatzen dituzte, malguagoak direnak datetan eta destinotan: «aurrekontuaren eta bezeroak nahi duenaren arabera egokitu egiten ditugu planak. Kofreak, aldiz, mugatuagoak dira, eta egokitu egin behar zara nahitaez dagoenera. Normalean, hotel bereziak eta ekintza bat izaten dira: bodega bat, spa bat, musikal bat...».
Beste aukera bat da bonoena: «bonoetan oparitzen duenak sujeritzen du destino bat, baina azkenean, zuk erabakitzen duzu». Hortaz, aurrekoa baino zabalagoa da.
«2019ko dena ez dago erreserbatzeko moduan, baina asko bai»
Oparietan ez ezik, datorren urteko oporretan pentsatzen hasteko unea ere izaten da urte bukaera: Aste Santua, datorren urteko zubiak, udara... Hernani Bidaiakeko langileen ustez, «Aste Santua orain hartu behar da!». Eta gainontzekoa, «hasi daiteke begiratzen». Hala egiten omen du «hurrengo urteko oporrak dakizkienak, prezio hoberenak eta aukera hoberenak lortzeko», diote. Momentu honetan «2019ko dena ez dago erreserbatzeko moduan, baina asko bai: kruzeroak, 2020ra artekoak hartu daitezke, eta taldekako bidaiak, 2019rako ere bai: gida batekin, taldean, bisitatu daitezke Bilbotik joanda Tailandia, Vietnam, India edota Errusia, adibidez. Horregatik, onena begiratzen hastea da, bestela, garestitu egiten da, eta ez zara joaten!».
Destinoen artean denetarik dagoela onartzen dute, bereziki uda partean: «udaran zehar hernaniarrok bost kontinenteak zapaltzen ditugu».
Gainera, azkenaldian «oso geldirik» egon diren destino batzuk azkeneko urte honetan asko mugitzen ari direla ziurtatzen dute: Egipto, Israel, Maroko, Estambul, Uzbekistan, Tunisia...