Egun berezia izango da gaurkoa guraso askorentzat. Pausoka elkartearen alde, dantzan jarriko dute Biteriko areto nagusia, gaur, iluntzeko 19:00etan hasita. Eta horretarako emanaldi berezia prestatu dute, mota guztietako dantza saioekin, eta magiarekin.
Behar bereziak dituzten haurren gurasoen elkartea da Pausoka eta emanaldi solidarioa izango da: «helburua da dirua jasotzea, Hernanin eta Urnietan dauzkagun zentroek funtzionatzen segi dezaten. Gero eta ume gehiago daude, eta gero eta gauza gehiago behar dira».
Ttarla dantza taldeak dantzatuko du agurra, hasteko, eta segidan Atzegi elkartearen emanaldia eta Mikel eta Maialenen salsa saioa izango dira ondoren. Marsel magoa igoko da gero taula gainera, eta hortik aurrera, makina bat dantza saio: euskal dantza Ttarlak; tangoa Mari Carmenek eta Rafak; funkya sevillanak eta balleta Ainara dantza taldeak; batxata sensuala Maialenek eta Julenek; dantza garaikidea Biteri taldeak; milonga vals Marianek eta Jesusek; eta salsa Biteri taldeak.