Azken urteotan egin den moduan, aurten ere Hernaniko Udalak Oroimen Historikoari buruzko jardunaldiak antolatu ditu. 2018ko abenduaren 17tik 20ra, Oroimen historikoa berreskuratuz, 2018: Migrazioak, Hernanitik Hernanira migranteak izenburupean egitarau zabal bat antolatu du.
Aurkezpenean, Koro Etxeberria, kultur zinegotziak eta ‘Txuso’ Gomez udal artxiboko teknikaria jardunaldiaren nondik norakoak azaldu zituzten. «Hernaniko gizarteak XIX-XXgarren mendeetan zehar bizitutako migrazio-fenomeno horiek memoriatik berreskuratu nahi izan ditugu». Horretarako egitarau zabala prestatu da.
Bi hitzaldi, erakusketa eta antzezlana datorren astean zehar
Abenduaren 17an eta 18an bi hitzaldi eskainiko dira, 19:30etan Biterin. Lehendabizikoa, astelehenean Joseba Etxarri kazetariak eskainiko du eta historian zehar Euskal Herritik joandako migranteak izango dira hizketagai Euskaldunak, emigrante izenburupean.
Hurrengo egunean, asteartean abenduak 18, Jon Maia bertsolaria izango da hizlaria. Extremaduratik bertsolaritzara, integrazio istorio bat hitzaldia eskainiko du XX. mendean, Frankismo garaian, Euskal Herrira etorritako migranteak gaia hartuta.
Erakusketa ere egongo da astelehenetik urtarrilaren 5era arte. Nahiz eta astelehenean zabaldu inaugurazio ekitaldia abenduaren 19an, asteazkenean, egingo da Biterin, 20:00etan. Musika egongo da eta Hernaniko gizarteak bizitako migrazioak irudi eta testuen bidez ezagutzera emango dira.
Jardunaldien barruan antzerkiarentzat ere egongo da lekua. Ligeros de equipaje. Crónica de la retirada antzezlana eskainiko da, abenduaren 20an, ostegunean, Biterin 20:00etatik aurrera. Gazteleraz da eta Huescako talde batek eskaintzen du. 1936-1939ko gerra garaian Frantzia aldera ihes egindako pertsonen esperientzietan dago oinarrituta.
«Migrazioa gaurkotasun haundiko eta gordineko fenomenoa delako, gogoratu nahi izan dugu migrazio-mugimenduak betidanik izan direla, historian zehar ohikoak. Lehen, orain bezala, hainbat arrazoi medio populazioaren zati batek, bere jatorria atzean utzita, bizileku berriak eta aukera berriak bilatzera alde egin du» adierazi zuen Etxeberriak.
«Historikoki, Euskal Herriko gizartea biztanleriaren esportatzailetzat definitua izan da... XX. mendearen hasieratik, 1975era arte gutxi gorabehera, Euskal Herria, Gipuzkoa eta Hernani populazioaren hartzaile gune bihurtzen dira. Horrek berekin ekarri ditu ondorio demografikoak, sozialak, urbanistikoak, kulturalak... gaur egungo gizartea, Euskal Herrikoa, gipuzkoarra, hernaniarra... itxuratzen dituztenak» aipatu zuten Etxeberria eta Gomezek.
EGITARAUA
ABENDUAK 17 ASTELEHENA
- Migrazioak. Joan-etorriak irudiak erakusketaren irekiera. Urtarrilaren 5era arte egongo da irekita. 18:00etatik 20:00etara, Biterin.
- Hitzaldia: Euskaldunak, emigrante. Historian zehar Euskal Herritik joandako migranteak. Joseba Etxarri hizlaria. 19:30etan, Biteri kultur etxean.
ABENDUAK 18 ASTEARTEA
- Hitzaldia: Extremaduratik bertsolaritzara, integrazio istorio bat. XX. Mendean, Frankismo garaian, Euskal Herrira etorritako migranteak. Jon Maia hizlaria. 19:30etan, Biteri kultur etxean.
ABENDUAK 19 ASTEAZKENA
- Erakusketaren inaugurazio ekitaldia Biteri kultur etxean, 20:00etan. Migrazioak. Joan-etorriak irudiak. Musikaz girotua egongo da.
ABENDUAK 20 OSTEGUNA
- Ligeros de equipaje. Crónica de la retirada antzerkia Biterin, 20:00etan. Producciones Viridianak eskainiko du