Etxebizitzaren egoera «ikusarazi eta salatzeko», erakusketa jarri da Plaza Berrin, Hernani Solidarioa-Etxebizitza-eskubidea izenburupean. Hamar panelek osatzen dute erakusketa eta Giza Eskubideen Aldarrikapen Unibertsaleko 25. artikuluarekin hasten da.
Elkarretaratzea, testuen irakurketa, musika eta jan edana, azken egunean
Hilaren 18ra arte egongo da ikusgai erakusketa. Data ez da nolanahi aukeratua izan: Irekiera izan da Giza Eskubideen Aldarrikapen Unibertsalaren 70garren urteurrenaren egunean eta itxiera aldiz, hilaren 18an, Pertsona Etorkinen Nazioarteko Egunean bertan.
Arratsaldeko 18:00etan izango da, Plaza Berrin. Euria egiten badu, aldiz, Atsegindegin egingo dute. Bigarren egun horretan bertan emango zaio bukaera, erakusketari. Modu berezian egingo dute hori ere: «elkarteetako ordezkarien eskutik, itxiera egingo dugu etxebizitza-eskubideari, elkartasunari, aterpeari eta migrazioari erreferentzia egiten dizkieten poema eta testuen irakurketarekin». Musika ere ez da faltako eta ahora eramateko pintxo eta edariak ere egongo dira.