Hutsik egin gabe, lider jarraitzen du Jaime Romerok

Bi proba izan zituzten aurreko asteburuan, pistan, txirrindulari astigartarrek: Donostiako belodromoan, Bio Racer Sarian; eta Portugalen, Anadiako Nazio­arteko Sarian. Eta bietan aritu dira maila ederrean.

Jaime Romerok, junior mai­lako lidertza defendatu behar zuen beste behin, Anoetako be­lodromoan; eta probarik irabazi ez zuen arren, haunditu egin zu­en, hurrengo sailkatuekin zeukan tar­tea: 130 punturekin dago, Eneko Lazkano bigarrenak baino 25 gehiago.

Tempo proban aritu ziren aurrena, eta bigarren sailkatu zen Romero, Asier Pozo taldekidearen atzetik; tarteko bost sprint irabazi zituen bakoitzak, baina aurretik helmugaratu zen Pozo, eta horrek eman zion garaipena. Eneko Lazkano izan zen hirugarren.

Puntuazio proba, berriz, oso nahasia izan zen, etengabeko erasoekin; tartean, Romerore­nak. Baina probaren bigarren zatian, ezin izan zien erantzun Iñigo Eizagirreren eta Lazka­no­ren erasoei, eta bi bueltako aban­taila lortu zuten biek. Azke­nean, bosgarren izan zen Ro­me­ro. Lazkanok bigarren bu­ka­­tu zuen, eta bera da sailkapen nagusiko bigarrena, orain.

Portugalen bikain, Telmo Semperena
Bio Racer Sariko laugarren jardunaldi hori baino lehen, Telmo Semperena astigartarra zegoen bigarren, baina ez zuen parte hartu; eta orain, seigarren postura jaitsi da.

Izan ere, Donostian ez, Por­tugalen aritu zen Semperena, Euskadiko selekzioak deituta. Anadia he­rri­ko Nazioarteko Sarian aritu zen, eta baita maila bikaina eman ere.

Lau probako omniuma le­hia­tu zuen larunbatean. Scratch probarekin ekin zion, 10garren postuan; eta zazpigarren izan zen tem­po proban. Hirugarre­ne­an, eliminazio proban, eman zuen mailarik onena: bigarren izan zen, Rodrigo Caixas por­tugaldarrarekin azken sprinta gal­duta. Puntuazio probarekin eman zioten bukaera, eta ia sprint guztietan puntuak pi­la­­tuta (horietako bat irabazi ere egin zuen), probako hirugarren onena izan zen. Horrela, bosgarren postuan bukatu zuen omniuma, 121 punturekin; irabazleak baino 13 puntu gutxiago bakarrik.

Igandean, beste bi probatan aritu zen. Puntuazioan seigarren izan zen, eta gero, scratch proban, ezustekoa ematen sa­ia­tu zen, proba ia osoa ihesaldian eginda; baina bi itzuliren faltan harrapatu zuten.

Donostian berriro, gaur
Bio Racer Sa­riko bosgarren jardunaldia izango da gaur, arra­tsaldeko 15:30etan hasita, Do­nostiako belodromoan. Scratch eta puntu­azio probetan ariko dira juniorrak eta 23 urtez azpi­koak, elkarrekin.