Festa berezia antolatu du Astigarragako Gazte Asanbladak, larunbat honetan. Upelio eguna ospatuko dute, 20ko hamarkadan girotuta, Zipotza elkartean. Chimamanda talde astigartarraren kontzertuarekin hasiko da, 19:00etan, Zipotzaren ondoan. Eta bukatzean, triki poteoa egingo dute.
Afarirako txartelak, bihar arte salgai
Eta festa borobiltzeko, afaria egingo dute Zipotza elkartean, gaueko 21:30etan hasita. Horretarako, txartelak salgai daude, Zipotzan bertan; eta bihar da erosteko azkeneko eguna. 15 euro dira, laguneko.
Jantzietarako, gomendioak
Upelio eguna 20ko hamarkadan girotuta egongo denez, garaiko jantziekin joatea eskatu diete herritarrei, eta gomendio batzuk ere eman dituzte. Emakumeak, jantzi ohi ziren soinekoarekin, txorkatilak agerian zituztela eta gerrialde zabalarekin; koilare luzea, media beltzak edo txuriak, eta buruan, txapela edo diadema janzten zuten.
Gizonek, berriz, pintzadun galtzak eramaten zituzten, beltzak edo urdinak; alkandora txuria, eta gainetik, txalekoa eta beroki luzea; pajarita ere jantzi ohi zuten, eta buruan, kapela.