Abenduaren 21a izango da Santo Tomas eguna, hurrengo ostiralean. Baina Astigarragan, aste honetan bertan ospatuko dute. San Tomas azoka jarriko dute larunbatean Foru Plazan, Herri Eskolako gurasoek eta irakasleek antolatuta, Udalaren babesarekin.
Goizeko 10:30etan hasiko da festa, bertan, eta goiz osoan zehar egongo dira postuak plazan: nekazarien produktuenak, batetik; eta Herri Eskolako ikasleek egindako gozoenak, bestetik.
Erakusketak ere egongo dira, eta bi tailer: baserritar zapiak nola jantzi erakusteko txokoa; eta zuhaitza apaintzeko tailerra. Musika ere ez da faltako, noski. Azoka hasten denetik, trikitilariak ibiliko dira herria alaitzen. Eta gero, kantu jaialdia ere egingo dute, Foru Plazan bertan.
Zozketak, bukatzeko
Eta azokari bukaera emateko, aurten ere zozketatuko dituzte, txerritxoa eta saskiak. Eguerdiko 13:30etan izango da hori, eta zozketarako txartelak, azokan bertan salduko dituzte, goizean zehar.
Produktuen postuez gain, taberna ere jarriko dute Foru Plazan, Arantzazuko Ama ikastetxeko DBHko ikasleek.