Xabier Lertxundi Asteasuintzarra izango da Hernaniko EH Bilduren zerrendaburua maiatzeko udal hauteskundeetan. EH Bilduk plazaratutako prentsa oharrean dio «egun zinegotzi den 35 urteko hernaniarra izan da 2019-2023 legegintzaldirako zerrenda aukeratzeko prozesuan hautagai bakarra, Udaleko taldekideek eta EH Bilduko zenbait kidek proposatuta. Besteak beste Luis Intxauspe alkateak eta EH Bilduko beste zazpi zinegotziek, Lur Etxeberriak, Juan Mari Olanok, Kistiñe Lujanbiok, Alazne Arozenak eta Aitzol Arrietak».
Azken lau urteotan, EH Bilduko zinegotzia eta Zerbitzu Sozialetako presidentea izan da Xabier Lertxundi zerrendaburua. Pedagogia eta psikopedagogian lizentziaduna da, hezitzaile moduan lan egin du beti, azken zortzi urteotan arriskuan dauden adingabekoekin eta horien senideekin. Lertxundik adierazi du «ardura handiko erronkari heldu diola, batez ere Udaleko zinegotzi taldeak eta EH Bilduko taldeak emandako babesa aintzat hartuta. Hernaniar guztiekin batera egin nahi du aurrera, «uste dudalako, denen artean egindako lanak askoz ere hobeak izaten direla».
Larunbatean, aurkezpena eta bilera
Datorren larunbat eguerdian EH Bilduk Hernanin burutuko duen ekitaldian aurkeztuko du Xabier Lertxundi alkategaia. Aurretik, hernaniarrak gonbidatuta daude goizeko 09:00etatik 12:00etara Andre Kaleko bilgunean egingo den bilerara.
Bertan, 2015-2019 legealdirako aurkeztutako herri programa aztertuko da; duela 4 urte egindako proposamenen balantzea-diagnosia egin eta gero abiatuko da beste lau urtetarako herri programa finkatzeko prozesua.