2019ko txotx irekierak Hernanin baditu aurten bi berrikuntza garrantzitsu; asteko eguna eta lekua aldatu dira. Orain arte igandean egiten zen, Gudarien plazan, eta aurten ostiralez, urtarrilaren 18an, egingo da Tilosetan. Eguraldi txarra egiten badu Atsegindegira pasako da.
Sagardo Apuruaren barruan argitaratu ziren berrikuntzak eta 2018ko uztaren datuak ere eskaini ziren. Euskal Herrian aurten guztira 11,78 milioi litro sagardo egin dira. Sagardoa prest dago sagardotegietan eta txotx irekiera eta gero dastatu ahalko da.
Intentsitate haundikoa eta txinparta finekoa
Sagar urte lasaia izan da iazko uzta oparoa eta gero. Hala ere, kalitate oso haundikoa izan da. Aurten sagar ale txikiagoa izan da eta likido gutxiagokoa. Muztioa gutxiago atera bada ere, kontzentratuagoa izan da eta azukre gehiagokoa. Orokorrean halakoa dator: Aroma aldetik intentsitate haundikoa, estruktura, gorputz eta izaera haundikoa eta txinparta finekoa.
Egin diren 11,78 milioi sagardo litrotik hamaika dira Gipuzkoan egindakoak. Aurtengo uzta berezia izan da Gipuzkoan. Oso mailakatua eta banatua. Espero bezala, lore garaian egindako eguraldi busti eta hotzek polinizazioa nekeztu dute erlearen ibilera ez delako behar bezalakoa izan. Ondorioz, lore polinizazio gutxiago izan da eta uzta gutxiago. Sagarra ohi baino lehenago iritsi da, baita berandukoa ere. Azpimarragarria da sagardotegien dibertsifikazioa.