Bio Race Oiartzun Bike txapelketako hirugarren jardunaldia jokatu zen Donostiako Antonio Elorza belodromoan eta Jaime Romero astigartarra izan zen jardunaldiko protagonista eta garaile nagusia.
Guztira 138 txirrindulari aritu ziren; kadete, junior eta nesken mailan eta kopuru altu honek eragin zuen Open mailako probarik ez egotea. Horrela, Astigarragako bi txirrindulari bakarrik lehiatu ziren; Jaime Romero eta Telmo Semperena. Eta nola gainera.
Romero arratsaldeko izarra izan zen bi frogak irabazi eta gero. Lehenengoan, scrachtean, Jaimek eraso egin zuen eta itzulia hartu zien pelotoiko kideei, nahiz eta gero beste sei txirrindularik, horien artean Telmo Semperenak ere itzulia hartu zuten. Indartsuenak zirela erakutsi zuten arratsaldean zehar.
Azken esprintean, Xabier Isasak irabazi zuena, Jaime Romero (Bazpi), sailkatu zen itzulia irabazia zutenen artean aurrena, eta beraz froga hau eraman zuen poltsikora. Telmo Semperenak (Donosti Berri) lortu zuen bigarren postua eta Asturiar selekzioko Guillermo Pedregalek hirugarrena.
Juniorren bigarren froga puntuazioa izan zen eta hemen ere Jaime Romero gailendu zen. Beste bost txirrindularirekin batera itzulia irabazi zuen, baina puntu gehien berak batu zituen bost horien artean, tarteko esprinetan, eta 42 punturekin garaipena lortu zuen.
Iparraldeko Eneko Lazkano eta Alexander Leaute sailkatu ziren jarraian puntuazio frogan. Telmo Semperena bederatzigarren geratu zen puntuazioan.
Bi astigartarrak lehendabiziko bi postuetan eta Euskadiko selekzioarekin lehiatuko da bihar Telmo
Gauzak ezin hobeto doaz bi txirrindulari astigartarrentzako. Jaime Romero lider da 102 punturekin eta bigarren Telmo Semperena herrikidea dago sailkatua 81 punturekin. Asier Pozok postu bat galdu eta hirugarren kokatu da orain 78 punturekin. Bihar bertan laugarren jardunaldia korrituko da Donostiako belodromoan, baina Telmo Semperena ez da ariko eta bere postua arriskuan dago. Litekeena da, bigarren postutik atzera egitea, asteburu honetan bertan.
Izan ere, Euskadiko selekzioarekin bidaiatu du berak Portugalera, eta bihar lehiatuko da bertan. Hori horrela, bigarren postu hori ez ezik, gehiago ere galdu ditzake.