Partidu zailak tarteko, bolada txarrean sartu da Hernani, Ohorezko Mailan, hiru partidu jarraian galduta. Azkenekoa, Ordiziaren kontrako derbia, Altamiran, aurreko igandean. Gaurkoa ez daukate aukerarik egokiena, ordea, egoerari buelta emateko. Ligako liderra hartuko dute Landaren, El Salvador, arratsaldeko 16:00etan hasiko den partiduan.
Talde indartsua da Valladolidekoa, Quesos herrikideari ligako titulua lehiatzeko gai izan den bakarra, azkeneko urteotan. Eta indartsu hasi du aurtengoa ere, hamar partidutik zazpi irabazi eta bi berdinduta. Baina esperantzarako tartea badute hernaniarrek. Batetik, Burgos igo berriaren zelaian galdu zuelako El Salvadorrek (Hernanik irabazi egin zion Burgosi); eta bestetik, talde haundien kontra ere oso lehiakor ari direlako trikoloreak, denboraldi honetan. Horren adibide da, Quesosen kontra azkeneko minutuan jasotako porrota.
Beraz, Ordiziaren zelaian bezain ausart, garaipenaren bila aterako da Hernani, zaleen aurrean oraingoan.