Atopiarpg, euskarazko lehenengo rol jokoa izango da eta proiektuari Sormen beka eman diote Durangoko Azokan. Landako Guneko areto nagusian egindako agerraldian Etzi Portu Maritimoa taldeak aurkeztutako joko egitasmoa izan da guztien artean aukeratua.
Bekaren zati haundi bat Aranori dagokio taldeko zazpi partaideetako bi, Ohiana Kalparsoro eta Unai Gorrotxategi, aranoarrak dira eta. Eta aurreratzen du «Aranon zerbait gertatuko dela. Zehazteko dago baina ziurrenik rol partida bertan jokatuko da».
Proiektuaren originaltasuna azpimarratu zuen epaimahaiak: «Rol joko bat euskaraz, literatura fantastikoaren eta jolas kolektiboaren gurutze-bidean, sortzaile talde dinamiko batek ekartzen duena. Irudimena eta irudiak lantzen dituzte, Euskal Herriko gaurkotasunean errotzen da, eta umorea ere sartzen da narrazio eta komentarioetan», nabarmendu zuen Itxaro Borda epaimahaikideak.
15 mila euroko beka eta urtebete jokoa aurkezteko
«Gabezia» batetik abiatutako proiektua da ATOPIArpg, sortzaileen hitzetan, euskarazko rol jokoetan dagoen hutsunea bete asmo duena, hain zuzen ere. «Lagunekin elkarri ipuinak kontatzeko modu bat da, tradizio luzea duen literatura forma bat. Ez genuen euskarazkorik aurkitzen, eta nork argitaratuko duen itxaroten egon beharrean, iruditu zitzaigun hobe zela guk geuk sortzea», adierazi du Xabier Landabidek, joko egitasmoaren sustatzaileetako batek. Harekin batera, halaber, Galder Gonzalezek, Beñat Irasuegik, Yerai Gasconek, Gorka Salcesek, Eneko Olazabalek eta aipaturiko Unai Gorrotxategik eta Ohiana Kalparsoro aranoarrak ondu dute proiektua.
Urtebeteko epea izango dute jokoa sortu eta argitaratzeko. Horretarako, Durangoko Udalak emandako 15.000 euroko beka jasoko du taldeak, eta heldu den urteko azokan aurkeztu beharko dute.
Dobera Euskara Elkartea, Goienkale 16an
Sormen beka ez da Durangotik datorren albiste bakarra. Azoka azken bi egunetan sartuko da gaur eta jende askok asteburura itxaroten du bertaratzeko. Dobera Euskara Elkarteak, urtero bezala, stand propioa jarri du aurten ere. Goienkaleko 16 zenbakian dago kokatua, eta bertan ari da elkartearen eta bazkideen hainbat lan saltzen. Tartean da, Ipuin Faktoriaren barruan Doberak argitaratu berri duen Txori txikia eta kokodriloa.
Hernaniar zati bat baduten bi taldek euren diska berriak aurkeztuko dituzte Durangon: Esne Beltzak eta Huntzak.
Aztarna argitaletxeak ere izango du musika aukeran: batetik, Balen Lopez de Munain gitar-jole bilbotarraren lan berria aurkeztu dute, baita Alboka taldearen Lurra, ur, haize lana ere. Hernani Errotzenek ere, bere txokoa dauka Nabarralderen standean.