Pausoka elkartearen alde, dantzan jarriko dute Biteriko aretoa, datorren ostiralean. Iluntzeko 19:00etan hasita, emanaldi berezia prestatu dute, mota guztietako dantza saioekin, eta magiarekin. Emanaldi solidarioa izango da: «helburua da dirua jasotzea, Hernanin eta Urnietan dauzkagun zentroek funtzionatzen segi dezaten. Gero eta ume gehiago daude, eta gero eta gauza gehiago behar dira, eta hori mantendu egin behar da».
Ttarla dantza taldeak dantzatuko du agurra, hasteko, eta segidan Atzegi elkartearen emanaldia eta Mikel eta Maialenen salsa saioa izango dira ondoren. Marsel magoa igoko da gero taula gainera, eta hortik aurrera, makina bat dantza saio: euskal dantza Ttarlak, tangoa Mari Carmenek eta Rafak, funkya sevillanak eta balleta Ainara dantza taldeak, batxata sensuala Maialenek eta Julenek, dantza garaikidea Biteri taldeak, milonga vals Marianek eta Jesúsek, eta salsa Biteri taldeak.
Sarrerak, salgai
Emanaldirako sarrerak, salgai daude herriko hiru dendatan: Antziola okindegian, Meri goxoki dendan, eta Jantzi mertzerian. Helduen sarrera 8 euro dira, eta haurrena 4 euro.