Hizkuntza praktika ekologikoak izango ditu oinarri, Euskararen Ginkanaren seigarren edizioak. Datorren urteko hasieran izango da, eta dagoeneko zabalik dago izenematea, urtarrilaren 7ra arte. Lau eta sei lagun arteko taldeak osatu behar dira parte hartzeko, eta Ginkanaren web orrian sartu gero: www.euskararenginkana.eus, eta Lehiaketak atalean, egingo diren ginkanetan bilatu.
Aurtengo edizioan, gainditu beharreko probak eta galderak, «lotuta egongo dira hizkuntzen garapen jasangarrirako lagungarri diren hiztun eta hizkuntza-komunitateen ekimen eta praktikekin», Kutxa Ekogunetik aurreratu dutenez. Alegia, jolasen bidez helduko diote, «hizkuntza aniztasuna bermatzeko erronka unibertsalari».
Bi fase, lehiaketak
Aurreko edizioetan bezala, bi fase izango ditu lehiaketak. Aurreneko fasea, internet bidez jokatuko dute, eta bost proba erantzun beharko dituzte taldeek. Proba horietan puntuazio altuena lortzen duten lau taldeak, pasako dira bigarren fasera; Ekogunean egingo den finalera, hain justu. Makina bat proba izango dituzte han ere, zuzenean erantzuteko.