Dyntra indizeak 159 neurgailu erabiltzen ditu Udalen gardentasuna neurtzeko, eta EAEko udalen azterketaren emaitzak argitaratu berri ditu. Horren arabera, Hernaniko Udala EAEko 15.000 biztanletik gorako udalerri gardenen artean 9garren postuan dago, erabiltzen diren 159 neurgailuetatik 78 beteta; hau da, %49 beteta.
Aurreneko hiru postuetan Bilbo, Gasteiz eta Donostia daude hurrenez hurren, neurgailuen %89 eta %88 beteta.
Udalak jakinarazi du «mundu mailako aurreneko plataforma parte-hartzailea» dela Dyntra, erakundeen gobernu irekiaren kudeaketa neurtzen duena.
Udal antolaketa eta ekonomia datuen gardentasuna, nabarmen
Udalen gardentasun maila neurtzeko Dyntra indizeak erabilitako 159 neurgailuak sei gaitan banatu dira: udal antolaketa, parte-hartzea, ekonomia, kontratazioa, hirigintza eta datuen gardentasuna.
Uztailetik azarora %32tik %49ra egin da, gardentasunean.
Hernaniko Udalaren kasuan, %100 betetzen dira udal antolaketari buruzko datuei dagozkien neurgailuak; hau da, Open Data. Ekonomia datuen gardentasunari lotutakoak, berriz, %59,26an betetzen dira; hirigintza eta obra publikoen ingurukoak %50ean; datuen gardentasunarenak %48,39an; parte-hartzearenak %45,45ean; eta zerbitzuen kontratazioarenak %33,33an.
Kronologikoki gardentasunerantz egin den bilakaera ere erakusten du Dyntrak; uztailetik azarora %32,08tik %49,06ra pasa da Hernani.
«Hobetzeko pausoak ematen jarraituko dugu»
Inhar Olano, modernizazioko zinegotziaren esanetan, datu hauek «Udal Gobernuak azken urteotan gardentasunaren alorrean egindako lanaren emaitza» dira. «Gobernu programan hartutako konpromisoei jarraiki, Udala eta herritarren arteko harremanak hobetzeko pausoak ematen ari gara. Gure gobernantza eredua herritarren parte-hartzean oinarritzen dugu».
Era berean, emitza ona bada ere, hobetzeko badagoela gaineratu du. «Udala herritarrei irekitzen jarraitzeko konpromisoa dugu, eta gardentasunean eta herritarrekin harremana hobetzeko pausoak ematen jarraituko dugu».