Azaroaren 28ko Plenoan EH Bilduren eta PSE-EEren aldeko botoekin eta EAJren abstentzioarekin onartu zen EH Bilduk aurkeztutako mozioa, DBH kanposantu azpialdean, Anibarren, kokatu behar dela berresten duena. EH Bilduren ustez, «behin teknikarien txostenak ezagututa, EAJk Anibarreko kokagunea babestu ez izana oso kezkagarria da».
DBH Ergobian kokatzea, bideraezina
EH Bilduk prentsa oharrean azaldutakoaren arabera, urri bukaerako Hirigintza Batzordean aurkeztu zuten txostena Udal arktektoak eta aholkulari juridikoak, EAJk Urumea Berriko promotorearekin batera DBHrako proposatutako kokapen berriaren inguruan. «Biek egungo Plan Orokorrak, aurreko legealdian EH Bilduk tramitatutakoa, jasotzen duen kokapena lehenetsi eta EAJ eta promotorearen Ergobiako kokapena baztertzen dute. Gogorarazi behar da EAJk DBHren lur-zoruaren truke promotoreari beste 180 etxebizitza gehiago eraikitzeko aukera eman nahi ziola».
Horrez gain, EH Bilduk azpimarratu du udal arkitektoaren argudio nagusia dela «EAJk DBH uholde eremuan aurreikusi izana». Hori horrela, «larritzat» jo du alkateak bideraezintasun hau orain arte publiko egin ez izana; «batzordean adierazi eta azken Plenoan onartu bezala, aspalditik bazekien DBH bertan kokatzea ezinezkoa zela».
Lanean hasteko beharra
Gauzak horrela, EH Bilduk kritikatu du «alkatearen jarrera arduragabea» eta «onartezina» izan dela dio, «herritarrei eta gurasoei informazio esentziala ezkutatuz, DBHren etorkizuna nahastarazi eta ezer ez aurreratu izana».
Txostenen berri jakinda, EH Bilduk guraso eta herritarrekin batzarra egin zuen egoeraren berri eman eta gurasoen kezkak jasotzeko, eta guztiarekin «gaia erdigunera ekartzeko herri aktibazioa aldarrikatu» zuen. Horregatik aurkeztu zuen mozioa pasa den asteko Plenoan, eta bertan, DBHko eraikinak Anibarren behar duela berretsi eta Ergobiako kokapena behin-betiko baztertzeko eskatzeaz gain, eskatu zuen urtea amaitu aurretik beharrezkoak diren lurrak eskuratzeko tramiteekin hastea eta 2019ko aurreneko hiruhilekoan DBHrako partzelaren hiritartze-proiektuaren idazketa esleitzea. «EH Bilduk ez ditu EAJren atzerapen gehiago onartuko».