Gaur jokatuko dute azkeneko jardunaldia, Hernaniko Xake Txapelketan; 16:00etan hasita, Kixkal tabernan. Eta jokatuko diren hamaika partiden artean, batek hartuko du protagonismo berezia: Eugeny Makarovek eta Jose Mari Berrotaranek jokatuko duten partidak. Izan ere, txapela janzteko lehia izango da beraien artekoa. Makarov dago lider, 5 punturekin, eta berak dauka txapela lortzeko aukera gehien, nahikoa baitu enpatea gaurkoan.
Beste lehia nagusia, Udo Esnaola eta Magi Ijurko hernaniarren artekoa izango da. 4,5 punturekin daude, Berrotaran bezala, eta bien arteko irabazleak jasoko du Hernaniko onenari saria, Berrotaranek irabazten ez badu.
Beste 19 partehartzaileek, berriz, postuen dantzan izango dute jokoa, baina ez daukate aukerarik, saririk lortzeko.
Haurrentzako txapelketa azkarra, gaurkoan
Haurren artean, Ekaitz Devesa izan da nagusi, 5 punturekin, Jon Sagarna (4 puntu), Ekaitz Estefano (2 puntu) eta Beñat Devesaren (puntu 1) aurretik.
Baina beraien txapelketa bukatu bada ere, gaurkoan ere izango dute aukera, aritzeko. Izan ere, xake txapelketa azkarra antolatu dute, egun bakarrekoa, 14 urtetik beherakoentzat. Arratsaldeko 16:00etan hasiko da hori ere, Kixkal tabernan bertan.