Urriaren 21ean hasita, igandero burutu da Hernaniko Xake txapelketa, eta zazpi jardunaldiren ondoren, bihar emango zaio bukaera, final haundiarekin. Arratsaldeko 16:00etan hasiko da jardunaldia, Kixkal tabernan, eta bertan izango da sari-banaketa beranduago, arratsaldeko 18:30etan.
Eugeny Makarov dago sailkapenaren buruan 5 punturekin eta berak dauzka txapela janzteko aukera gehien; puntu erdira dauka Jose Mari Berrotaran, eta bere aurka jokatuko du bihar. Makarovek nahikoa du berdinketa txapelketa irabazteko.
Berrotaranekin berdinduta, 4.5 puntu dituzte Udo Esnaola eta Magi Ijurkok ere, elkarren arteko neurketaren irabazleak jasoko du Hernaniko onenari saria, betiere Berrotaranek Makaroven aurka irabazten ez badu.
Devesak, haurrena
Helduen sariekin batera, haurrenak ere banatuko dira. Sei asteetan zehar jokatu dute txapelketa haiek, eta Ekaitz Devesak irabazi du; bost punturekin sailkapeneko lider bilakatu da.
Txapelketa azkarra, bihar
Aurrekoetan bezalaxe, nahiz eta txapelketa bukatua izan, 14 urte arteko haurrentzako xake txapelketa azkarra jokatuko da bihar Kixkalen. Hau ere, 16:00etan hasita izango da.