Bilera-sorta hasi du Udalak herriko adinekoekin, Hernaniko Adinekoen Kontseiluan adostu bezala. Dagoeneko egin dituzte aurreneko bi bilerak, eta gaur izango dute hirugarrena. Zikuñagan izango da, arratsaldeko 18:30etatik 19:30etara bitarte, auzo elkarteko lokalean.
Ereñotzu eta Etxeberri, azkeneko biak
Nahiz eta aste honetan bilera bakarra egon, beste bi zita izango dira, hurrengo asteetan. Ereñotzu eta Etxeberri auzoetan izango dira azkeneko hauek, hilaren 11n eta 18an, hurrenez hurren. Denak ordu berean izango dira, 18:30etan.
Antziolan ere egiteko asmoa dagoela jakinarazi zuten, baina oraindik ez dute datarik zehaztu.
Eskubide eta zerbitzuen berri ematea, helburua
Aurten sortutako Adinekoen Kontseiluan adostuta egingo ditu Udaleko Zerbitzu Sozialen departamentuak bilera hauek. Gizarte langileak herrian eskura dauden zerbitzuen eta adinekoek dauzkaten eskubideen berri emango die. Besteak beste, zahartzaro aktiboa izateko herrian dauden aukerak azalduko zaizkie, baita jaso ditzaketen diru-laguntzak ere.