Hernaniarra da Estitxu Mateo, eta bertan bizi da, baina Ereñotzuko Txirrita Eskolara eramaten ditu semeak: «beraz, 3-4 arratsalde Ereñotzun pasatzen ditut», dio. Euskaraldiaren baitan, Ahobizi da aurreko ostiraletik, baina ‘euskeraren laguna’ da, lehenagotik.
Izan ere, Mateok ederki ondo daki zer den euskerari eustea; iaz aukera izan baitzuen Ereñotzun, antzeko esperientzia bateko protagonista izateko. «Lasarteko ideia hartu genuen, eta hamabost eguneko erronka jarri genuen. Horretarako, Maripilutxi izan nintzen, Euskararen Laguna. Urte batzuetan Huescan bizi izan zen Josurekin, berak Belarripresten rola hartu zuen, gelaz gela joan ginen, egitasmoaren berri ematen», azaltzen du.
Izan ere, Estitxu Mateok argi dauka: «nahiz eta hala ez iruditu, Ereñotzuko egoera ez da hain desberdina. Auzo euskalduna da, asko hitz egiten da eta bultzatzen da euskera, baina erderara pasatzen da igual-igual, eta ‘arriskua’ berbera da».
Eta kezka berezia dauka Mateok: «azkenaldian uste dut euskeraren erabilera jaisten ari dela eta izutu egiten nau. Gure guraso eta aiton-amonek egin duten ahaleginarekin... pena ematen dit!».
‘Euskaraldia’, positiboa
Testuinguru horretan, Euskaraldia bezalako ekimenak positiboak iruditzen zaizkio. «Hausnarketa gertatuko da», Estitxu Mateoren ustez, baina ez hori bakarrik; «talde lan bat da, eta gure hizkuntza maite dugunok batu eta indartu egingo gaitu», azpimarratzen du.
Erronka «pertsonala»
Ahobizi gisa ari da parte-hartzen Estitxu Mateo, eta bereziki, bi erronka aipatzen ditu. Aurrenekoa erabat pertsonala: «nahiz eta gurasoak erdaldunak izan, nik ikastolan ikasi nuen euskera, eta nire anai-arrebek ere badakite, baina ez dugu euskeraz egiten. Euskaraldia abiapuntu izango da horretarako; orain ez dago aukerarik!». Lanean ere, euskeraz aritzea da bere erronka: «nik harrera beti egiten dut euskeraz, baina normalean hori bakarrik. Horri buelta ematea zaila izango da». Baina saiakera egiteko prest dago Mateo, izan ere, berak badaki: «ni naiz neure gabeziak landu behar dituena». Eta halaxe egiten saiatuko da, asteartetik aurrera ere!