2016an abiatu zuen Udalak, Berdintasun eta Zerbitzu Sozialetako sailaren bidez indarkeria matxista bizi duten emakumeei arreta hobeagoa emateko Erakunde arteko jarduera eta koordinazio protokoloa Osakidetza, Udaltzaingoa eta Ertzaintzarekin batera.
Koordinazio bilerak egiten dituzte Protokoloa «errebisatu eta hobetzeko». Eta hain zuzen, horietako bilera baten ondorioz sortu du Udalak Indarkeria matxista bizi duten emakumeei arreta eta laguntza emateko Hernaniko baliabide eta zerbitzuen gida.
Atzo aurkeztu zuen Udalak, Berdintasun eta Zerbitzu Sozialetako ordezkarien eskutik. Bertan izan ziren Garazi Etxarri eta Xabier Lertxundi zinegotziak, hurrenez hurren; eta Maialen Apezetxea berdintasun teknikaria eta Silvia Sanchez gizarte langilea.
Udal eraikinetan, eskuragarri
Indarkeria bizi duten emakumeentzat informazio baliagarria eskaintzeaz gain, «herritar guztietantzat lagungarri» izatea nahi du Udalak, Lertxundik azaldu bezala.
Hori osatzerakoan, Berdintasun sailak eta Zerbitzu Sozialen departamentuak hartu du proiektuaren gidaritza, eta Elhuyar Aholkularitzarekin batera aritu dira lanean.
Horrez gain, «kontraste etengabean» aritu dira Ertzaintza, Udaltzaingo eta Osakidetzako profesionalekin, onartu zuen Etxarrik.
Bost hizkuntza erabiliz, lau bertsio izango dira; euskerazkoa izango dute denek, eta beste lauak izango dira: euskera-gaztelania, euskera-arabiarra, euskera-errumaniarra, eta euskera-frantsesa. Ingelesez ere argitaratzekoak direla azaldu zuten.
Horiek, ohi bezala, udal eraikinetan egongo dira eskuragarri, baita interneten ere: http://www.hernani.eus/eu/