Azaroko azkeneko astearekin, urtero bezala, elikagai bilketa nagusia egingo du gaur eta bihar Gipuzkoako Elikagai Bankuak, estatuko federazioaren deiari jarraituz. Gipuzkoako 42 herritako saltokietan egingo dute bilketa, tartean, Hernanin.
Lau saltoki, boluntarioekin
Herrian zehar, hainbat saltokitan eman ahal izango dira elikagaiak.
Elikagai Bankuko boluntarioak lau komertziotan izango dira: Zinkoeneako Eroskin, Dian, eta herriko bi Lidletan, Galarretan eta Floridan. Hain zuzen, 50tik gora boluntario izango dira herriko saltokietan, laguntzen.
Horrez gain, beren kabuz egingo dute bilketa Atsegindegiko Eroskin (Txarter) eta Super BMn.Elikagaiak emateaz aparte, Eroskin eta Super BMn elikagai-bonoak ere eskuratu daitezkeela gogorarazi dute antolatzaileek.
Premiazko elikagaien eske
Urtero bezala, premiazko elikagaiak eskatu ditu Gipuzkoako Elikagai Bankuak aurten: kakaoa, gailetak, kontserbak, azukrea eta olioa. Haur txikientzako produktuak ere garrantzitsuak direla jakinarazi dute.
Ez dute gomendatzen alkoholdun edariak eta erraz galtzen diren jakiak ematea.